Një shpërthim i fuqishëm ka ndodhur pasditen e kësaj të mërkure në rrugën Saint-Jacques në lagjen e 5-të të Parisit, mësoi gazeta “Le Figaro” nga selia e policisë.
Fasada e një ndërtese në lagjen e 5-të, u shemb dhe shërbimet e urgjencës po punonin për të përcaktuar nëse dikush ishte ende brenda, tha një zyrtar i policisë së Parisit për transmetuesin “France 24”.
Shpërthimi goditi një shkollë dizajni të njohur nga studentët e huaj pranë spitalit ushtarak historik Val de Grace, në buzë të lagjes Latine.
Shefi i policisë së Parisit, Laurent Nunez, u tha gazetarëve se ishin 16 persona të plagosur, duke përfshirë shtatë në “gjendje kritike”. Zjarri u kontrollua, por nuk u shua, tha Nunez.
Florence Berthout, kryebashkiaku i qarkut, foli për një shpërthim “jashtëzakonisht të fortë”, duke përshkruar copa xhami që ende bien nga ndërtesat.
Zëdhënësja e policisë Loubna Atta tha se ishte shumë herët për të përcaktuar burimin e incidentit dhe nuk mund të konfirmonte raportet se ishte shkaktuar nga një shpërthim gazi.
Imazhet televizive treguan rrënojat nga Akademia Amerikane e Parisit të shpërndara nëpër Rue Saint-Jacques dhe tym që dilte nga të paktën dy ndërtesa aty pranë që ishin djegur.
Shpërthimi ndodhi në orën 16:55 me orën lokale, pikërisht kur punëtorët po shkonin për në shtëpi.
Më shumë se 200 zjarrfikës u përfshinë në reagimin e emergjencës.
Ministri i Brendshëm Gérald Darmanin u bëri thirrje njerëzve të qëndrojnë larg në mënyrë që të mos pengojnë punonjësit e urgjencës.
Zona zakonisht është e mbushur me turistë dhe studentë të huaj në fillim të verës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com