Beçiroviç për “shkëputjen paqësore” të Dodik-ut: Qëllim kriminal që s’do e lejojmë kurrë, me asnjë çmim

“Shkëputja paqësore” është një eufemizëm dhe do të thotë sulm ndaj paqes dhe shtetit, ka thënë Denis Beçiroviç, Kryetar i Presidencës trepalëshe (boshnjake, serbe dhe kroate) të Bosnje e Hercegovinës, duke iu kundërpërgjigjur iniciativës antikushtetuese dhe anti-Dejton (Marrëveshja që i dha fund luftës në BeH, më 1995), të Republikës Srpska për shkëputje të këtij entiteti nga BeH.

Këto komente, Beçiroviç i ka bërë përmes një komunikate për media, dy ditë pasi që Presidenti ultra-nacionalist i Republikës Srpska, Millorad Dodik, tha se shumë shpejt do të dërgojnë marrëveshjen për “shkëputje paqësore”.

Mirëpo, Beçiroviç ia ka bërë të qartë se një veprim i tillë ka “qëllim kriminal” dhe se nuk do ta lejojnë kurrë që të ndodhë, pa marrë parasysh çmimin.

“Organet e Bosnje e Hercegovinës dhe subjektet e RS-së nuk do të kenë kurrë një bashkëbisedues për ‘shpërbërje paqësore’ apo ndonjë ‘shpërbërje’ tjetër, sepse askush nuk ka të drejtë as të mendojë të diskutojë për ndarjen dhe shkatërrimin e shtetit të BH-së”, tha fillimisht Beçiroviç.

Shteti i BeH-së, siç ka theksuar ai, “nuk u krijua nga ‘bashkimi’ në Dejton”.

“Vazhdimësia e shtetit të BeH-së është e rregulluar saktësisht me dispozitat e së drejtës ndërkombëtare dhe kombëtare. BeH ka ekzistuar edhe para dhe pas Dejtonit, dhe entitetet nuk kanë ekzistuar as para Dejtonit dhe nuk mund të ekzistojnë pa të”, thuhet në deklaratën që ka lëshuar kabineti i Beçiroviç-it.

Kreu i Presidencës së BeH-së ka potencuar se institucionet e shtetit që ai drejton dhe komuniteti ndërkombëtar “kanë detyrime të qarta në lidhje me mbrojtjen e paqes dhe rendit kushtetues”.

“Të gjithë ata që sulmojnë shtetin do të mposhten herët a vonë. Përkrahësit e politikës antikushtetuese duhet ta dinë se përmbysja e rendit kushtetues dënohet me burgim afatgjatë”.

“Asnjë zyrtar përgjegjës i BeH-së nuk mund të marrë asnjë dokument për të ashtuquajturat ‘marrëveshje për shkëputjen e RS dhe entiteteve të FBiH’. Një gazetë e tillë skandaloze dhe anti-Dejton nuk duhet t’i përgjigjet zyrtarëve politikë. Autoritetet kompetente gjyqësore të Bosnjë-Hercegovinës, përfaqësuesi i lartë i bashkësisë ndërkombëtare dhe faktorë të tjerë ndërkombëtarë që garantojnë Marrëveshjen e Paqes të Dejtonit duhet t’i përgjigjen në mënyrë adekuate asaj”.

Ai ka nënvizuar se duhet që t’i kujtohet opinionit ndërkombëtar dhe atij vendor se sa herë që Kasapi i Ballkanit, Sllobodan Millosheviç, Radovan Karaxhiç dhe protagonistë të tjerë serbë të mëdhenj përdorën termat ‘paqësor’ dhe ‘paqe’, “pas saj ata nxirrnin lëvizje që ishin të kundërta të tyre”.

“Prandaj duhet të shpjegojmë qartë se shprehja ‘shkëputje paqësore’ është një eufemizëm që përpiqet të zbusë një qëllim të rrezikshëm, shkatërrues dhe kriminal”.

Eufemizmi ‘shkëputje paqësore’ në thelb, sipas tij, do të thotë: “prishja e procesit të paqes dhe rrezikimi i paqes në BeH dhe në rajon; shkelje e normave themelore të së drejtës ndërkombëtare dhe kombëtare; minimi i Marrëveshjes së Paqes të Dejtonit dhe Kushtetutës së BeH-së; përpjekja për të shkatërruar një anëtar të plotë të Kombeve të Bashkuara – shtetin e BeH-së dhe kërcënimin e gjenocidit të ri dhe krimeve kundër njerëzimit”.

“Nga ana e shtetit të BeH-së, ekzistojnë arsye ligjore, historike, morale, civilizuese, ekonomike, demografike e shumë të tjera, thekson ai dhe shton se arsyet juridike pasqyrohen në dispozitat e së drejtës ndërkombëtare dhe kombëtare që mbrojnë shtetin e BeH-së dhe nuk japin asnjë argument ligjor për shpërbërjen e vendit tonë.

“Historia mëson se BeH mbijetoi pas shekujve të stuhishëm dhe të vështirë. Nuk mund të shkatërrohej as nga faktorë shumë më të fortë se ata që e sulmojnë sot. Arsyet morale dhe civilizuese paralajmërojnë se është e papranueshme që pas gjenocidit të kryer, krimeve kundër njerëzimit dhe krimeve të tjera të mendohet edhe për rifillimin e projektit kriminal të shkatërrimit të shtetit multietnik të BeH-së”, shtoi.

“Arsyet ekonomike sugjerojnë se çdo aventurizëm separatist do të kishte pasoja katastrofike për ekonomia, biznesmenët, punëtorët dhe përgjithësisht standardin e jetesës së qytetarëve të BeH-së. Argumentet demografike u tregojnë njerëzve të arsyeshëm se gjysma e popullsisë së vendit tashmë ka ikur nga politika e rrezikshme luftarake. Një përshkallëzim i ri i sjelljes së paarsyeshme do të çonte në një kolaps të plotë demografik, veçanërisht në BeH, për entitetin e RS”, paralajmëroi Beçiroviç.

Në fund, siç thekson ai, “separatistët duhet ta dinë se patriotët boshnjakë dhe aleatët e tyre kurrë, me asnjë çmim, nuk do të lejojnë shkatërrimin e shtetit të BeH-së”.

Dodik: Deri në fund të muajit do dërgojmë marrëveshjen për shkëputje të RS-së nga BeH

Ndryshe, më 24 maj, ambasada e Shteteve të Bashkuara të Amerikës në Sarajevë ka thënë se propozimi i Qeverisë së Republikës Srpska për t’u ndarë nga BeH është i rrezikshëm dhe i papërgjegjshëm dhe se një gjë e tillë “nuk do të nënkuptonte pavarësi, por fund për Republikën Srpska”.

Këto komente, ambasada e ShBA-ve në Sarajevë i kishte bërë pasi vetëm një ditë pasi që Qeveria e RS-së tha se në 30 ditët e ardhshme ajo do të krijojë një marrëveshje që do t’i dërgohet entitetit tjetër të Bosnjës, Federatës së Bosnje e Hercegovinës, për “ndarje paqësore”.

Por, për ambasadën amerikane, ky propozim është në shpërputhje me Marrëveshjen e Dejtonit (Marrëveshja qe i fund luftës në BeH, më 1995), dhe se “e vë në rrezik sovranitetin dhe integritetin territorial dhe karakterin shumetnik të Bosnjës”.

“Këto janë interesa thelbësore të SHBA-së. Shtetet e Bashkuara do t’i mbrojnë dhe ruajnë ato, mes tjerash, duke i mbajtur përgjegjës ata të cilët i rrezikojnë ato”, thuhet në komunikatën e ambasadës amerikane.

Aty u akuzuan Presidenti ultra-nacionalist i Republikës Srpska, Millorad Dodik, dhe Qeverina e RS-së, se u përpoqën ta arsyetojnë këtë vendim bazuar në “gënjeshtra dhe dezinformata, me qëllim për ta frikësuar popullin në Republikën Srpska, që t’i mbështesin ata në këtë rrugë të rrezikshme”.

“Faktet janë të thjeshta dhe të drejtpërdrejta. Nuk ka konspiracion ndërkombëtar për ta ndarë RS-në dhe Dodik nuk mund ta gjejë asnjë deklaratë ku një zyrtar amerikan bën thirrje për shuarjen e RS-së”, thuhet tutje në komunikatë.

Zëri i ShBA-ve në Sarajevë e bëri të qartë se, sipas Marrëveshjes së Dejtonit për Paqe dhe Kushtetutës së Bosnjës, Bosnja e Hercegovina (BeH) është trashëgimtare e Republikës së Bosnjë e Hercegovinës.

“Kushtetua e BeH nuk u jap të drejtë entiteteve apo njësive nënshtetërore për ndarje apo “shkëputje”. RS-ja mund të ekzistojnë vetëm brenda BeH.”

Veprimet e Dodik-ut, në vlerësimin e ambasadës amerikane, e rrezikojnë të ardhmen brenda institucioneve euroatlantike që populli i Bosnjës, përfshirë RS-së, e duan.

Çka ndodhi?

Kryeministri i Republikës Srpska – entiteti serb në Bosnje e Hercegovinë – Radovan Vishkoviç, kishte njoftuar me 23 maj, se në 30 ditët e ardhshme, qeveria që ai drejton, do të krijonte një marrëveshje që do t’i dërgohej entitetit tjetër të BeH-së, Federatës së Bosnje e Hercegovinës, për “ndarje paqësore”.

Kjo u bë e ditur pas mbledhjes së Qeverisë së Republikës Srpska të enjten e 23 majit, në prag të Asamblesë së Përgjithshme të Kombeve të Bashkuara (OKB), ku pritej të votohej – dhe u miratua – rezoluta që dënon gjenocidin në Srebrenicë.

“Kjo nuk është shkëputje, ndarje paqësore nuk është shkëputje, e drejta e garantuar me Kushtetutë është ndarja paqësore. Ne do të ofrojmë, nëse na konsideroni komb gjenocidal, që nuk jemi, atëherë nuk kemi pse të jetojmë së bashku”, tha Vishkoviç, transmeton “Radio Evropa e Lirë”.

Në këtë mbledhje të qeverisë prezent kishte qenë edhe Presidenti ultra-nacionalist i Republikës Srpska, Millorad Dodik.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.