Administrata e presidentit të Shteteve të Bashkuara të Amerikës (SHBA), Joe Biden, të hënën e 6 dhjetorit, ka publikuar Strategjinë e parë të Shteteve të Bashkuara Kundër Korrupsionit.
Sipas saj, përshkruhet qasja e qeverisë për luftën kundër korrupsionit, duke marrë hapa shtesë në reduktimin e aftësive të aktorëve të korruptuar që përdorin sistemet financiare të SHBA-ve dhe ato ndërkombëtare, për të fshehur pasuritë dhe për të pastruar të ardhurat e akteve korruptive.
“Efektet e dëmshme të korrupsionit ndikojnë pothuajse në të gjitha aspektet e shoqërisë”, shkruhet në hyrje të publikimit.
Administrata Biden shkruan se, korrupsioni “përkeqëson pabarazinë dhe polarizimin social, politik dhe ekonomik”. Po ashtu, “pengon aftësinë e shteteve për t’iu përgjigjur krizave të shëndetit publik, ose për të ofruar arsim cilësor”.
Gjithashtu ndikon dhe në degradimin e mjedisit të biznesit dhe mundësitë ekonomike, si dhe nxit konfliktin dhe vë në rrezik besimin në qeveri.
Për të udhëhequr zbatimin e këtyre politikave, Strategjia tregon “luftën e qeverisë amerikane ndaj korrupsionit, në pesë shtylla kyçe”.
Pesë shtyllat e Strategjisë
Për të udhëhequr zbatimin, Strategjia organizon përpjekjet e Qeverisë së SHBA-ve për të luftuar korrupsionin nën pesë shtylla që përforcojnë njëra-tjetrën:
Modernizimi, koordinimi dhe sigurimi i burimeve të qeverisë amerikane për të luftuar korrupsionin, ka qenë e para e listuar në Strategjinë e Biden Kundër Korrupsionit.
Kurse, frenimi i financimeve të paligjshme, ku aktorët e korruptuar mbështeten në dobësitë e Shteteve të Bashkuara dhe sistemet financiare ndërkombëtare për të “dëmtuar” pronësinë e aseteve, si dhe për të pastruar të ardhurat e aktiviteteve të tyre të paligjshme, renditet e dyta.
Mbajtja e përgjegjësive të aktorëve të korruptuar është shtylla e tretë që Strategjia trajton. Ndërsa qeveria e SHBA-ve mbulon boshllëqet rregullatore dhe punon me partnerët e aleatët, për të bërë të njëjtën gjë, gjithashtu mban përgjegjësi për ata që zgjedhin të përfshihen në korrupsion.
Ruajtja dhe forcimi i strukturës shumëpalësh në luftën kundër korrupsionit vijon të mbetet në fokus të qeverisë amerikane.
Edhe përmirësimi i angazhimit diplomatik dhe shfrytëzimi i burimeve të ndihmës së huaj për të arritur qëllimet e politikës kundër korrupsionit, ishte një ndër shtyllat e analizuar në përpjekje për të goditur korrupsionin.
Strategjia e Shteteve të Bashkuara Kundër Korrupsionit shënon një kapitull të ri në përpjekjet e Shteteve të Bashkuara për të frenuar efektet e dëmshme të korrupsionit.
Meqenëse përgjegjshmëria është jetike, departamentet dhe agjencitë federale do t’i raportojnë çdo vit Presidentit mbi përparimin e bërë kundër objektivave të Strategjisë.
Yuri Kim: Korrupsioni është kancer
Pas publikimit të kësaj strategjie, ka reaguar dhe ambasadorja e SHBA-ve në Shqipëri, Yuri Kim.
Corruption is a cancer. The US is taking additional steps to prevent corruption, combat illicit finance, hold corrupt actors accountable, and strengthen the capacity to expose corrupt acts. Here is the latest news from the White House 👇 https://t.co/fizzZZm0yL
— Ambassador Yuri Kim (@USAmbAlbania) December 6, 2021
Me togfjalëshin “Korrupsioni është kancer”, Kim shkruan në median sociale Twitter se, “SHBA-të po ndërmarrin hapa të mëtejshme për të parandaluar korrupsionin, luftuar financimin e paligjshëm dhe për t’i bërë përgjegjës aktorët e korruptuar.
Gjithashtu, për të forcuar kapacitetin dhe ekspozuar aktet korruptive.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com