![](https://albanianpost.com/wp-content/uploads/2023/08/standard_compressed_Vjosa_Osmani.jpg)
Presidentja e Kosovës, Vjosa Osmani, ka reaguar pas vrasjes së gruas në Qendrën për Punë Sociale në Ferizaj nga ish-bashkëshorti i saj të premten, duke kërkuar që të ndërprehen dënimet qesharake.
Osmani, përmes një shkrimi në rrjetin social ‘Facebook’ ka bërë thirrje që dënimet të ashpërsohen.
“Edhe një burrë që vranë një grua! Sërish femicid! Edhe një përkujtim se këta vrasës mizor të cilët ia kanë mësyrë të shkatërrojnë jo veç jetën e grave, por edhe thelbin e shoqërisë sonë mund të ndalen vetëm nëse të gjithë bashkohemi e rizgjohemi si shoqëri kundër këtij fenomeni të tmerrshëm”.
Osmani, kritikoi sistemin e drejtësisë dhe dënimet që po shqiptohen.
“Mjaft më me dënime qesharake. Mjaft më me sistem të çalë të drejtësisë. Mjaft më me dështim të shtyllave që do të duhej të mbronin gratë tona, qytetarët tanë. Ngushëllime të sinqerta familjes! Dënim maksimal për vrasësin!”, ka shkruar Osmani.
Edhe kryeministri i Kosovës, Albin Kurti, ka kërkuar që ky veprim të dënohet ashpër.
“Nuk kemi pse presim që t’i dijmë detajet: e dënojmë ashpër këtë krim që po përsëritet. Edhe një grua e vrarë mizorisht nga tyta e armës që ekzekuton nga afërsia”.
“Një grua e Kosovës e vrarë nga një vrasës burrë. Zemërimi dhe neveria bëjnë garë përbrenda secilit qytetar të Kosovës sot. Qytetarja e shtetit tonë të pavarur në Qendrën për Punë Sociale në Ferizaj u qëllua për vdekje”, ka shkruar ai.
Ngjashëm si Osmani edhe kryeministri, kritikoi sistemin e drejtësisë dhe efektin që ka pasur deri tani.
“Drejtësia të veprojë pa vonesa duke e pranuar që efekti i deritanishëm i ka ngelur i mangët e përgjegjësia i mbetet përherë e lartë”.
Çka ndodhi?
Të premten e 12 prillit nga Policia e Kosovës, u konfirmua për vrasjen e një gruaje në Ferizaj në Qendrën për Punë Sociale dhe një person tjetër mbeti i lënduar.
Lajmin për Albanian Post e kishte konfirmuar zëdhënësi i Policisë së Kosovës për rajonin e Ferizajt, Kanun Veseli.
“Me datën 12.04.2024 në ora 14:40 kemi pranuar një informatë se në Qendrën për Punë Sociale në Ferizaj ka të shtëna me armë zjarri . Për pasoj nga të shtënat e armës së zjarrit një person e gjinisë femërore ka ndërruar jetë në vendin e ngjarjes, kjo është konfirmuar nga mjekët kujdestarë”.
Më pas nga Prokuroria Themelore në Ferizaj, u bë e ditur se i dyshuari kryesor për vrasjen është ish-bashkëshorti i saj.
“Për momentin nuk kemi informacione, mirëpo dyshojmë që motivi është te një mosmarrëveshje mes ish-bashkëshortëve. Ata janë takuar afër Qendrës për Punë Sociale dhe aty ka ndodhur rasti. Personi ish-bashkëshorti është arrestuar”, ka thënë kryeprokurori Shukri Jashari në një deklaratë për media.
Ndërsa përmes një komunikate për media nga Prokuroria është thënë se i dyshuari është ndaluar për 48 orë për veprën penale “Vrasje”.
“I dyshuari në këtë rast, me iniciale V.A., me vendim të Prokurorit të Shtetit, është ndaluar në kohëzgjatje prej 48-orësh për shkak të dyshimit të veprës penale “Vrasja” sipas Kodit Penal të Republikës së Kosovës”.
Përmes një komunikate për media, policia ka konfirmuar se dorasi i dyshuar që ka kryer vrasjen është 36 vjecar, ndërsa viktima 21 vjeçare.
Ndërsa plagë trupore ka pësuar një person i moshës 15 vjeçar, i cili për ndihmë mjekësore është dërguar në Qendrën Emergjente në Ferizaj dhe është jashtë rrezikut për jetën.
Nga policia është sqaruar se fillimisht i dyshuari është larguar në drejtim të panjohurm, por që më pas u arrestua.
“Ekipe të policisë, policët e rendit, hetuesit e stacionit, hetuesit rajonal të mbështetura edhe nga Njësia e Reagimit të Shpejtë (NJRSH) kanë identifikuar të dyshuarin V.A ( M/K) i moshës 36 vjeçar dhe menjëherë kanë rrethuar zonën përreth dhe pas një pune intensive në terren , në orën 15:15 kanë arritur që të arrestojnë të dyshuarin e kësaj ngjarje dhe e kanë shoqëruar në Sektorin Rajonal të Hetimeve në Ferizaj, për procedura tjera hetimore”.
Brenda afatit ligjor, ndaj të njëjtit, nga Prokuroria Themelore në Ferizaj, është paralajmëruar se do të parashtrohet kërkesë për caktimin e masës së paraburgimit për veprën penale të lartëcekur.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com