70 vitet e Putin-it pa festë, në vetmi

Edhe dhuratat e ditëlindjes mund të japin përmasën e vetmisë.

Dy dhuratat e vetme nga shtete të huaja për ditëlindjen e 70-të të presidentit rus u dërguan nga presidenti i Taxhikistanit Emomali Rahmon dhe presidenti po aq i përjetshëm i Bjellorusisë Aleksandr Lukashenko, të cilët po konkurrojnë në media për titullin e aleatëve më besnikë, por nuk janë pjesë e listës së superfuqive.

Jashtë ish-bllokut të BRSS-së , i vetmi që u shfaq ishte Udhëheqësi Suprem i Koresë së Veriut Kim Jong-un.

Nëse ka pasur telefonata të tjera, askush nuk dëshiron t’i bëjë publike.

Në vitin 2013, vetëm 10 vjet më parë, Putin festoi ditëlindjen e tij në Bali, ku po zhvillohej Samiti vjetor i Bashkëpunimit Ekonomik Azi-Paqësor.

Në mbrëmje vonë, ai u ul në një tryezë për të pirë vodka dhe preu një tortë me emrin e tij mbi të.

Të ftuarit që buzëqeshnin pranë tij ishin presidenti kinez Xi Jinping dhe kryeministri japonez Shinzo Abe.

Atë ditë, Kremlini njoftoi se “mbi” pesëdhjetë mesazhe kishin mbërritur nga kancelaritë në mbarë botën për të festuar ditëlindjen e presidentit rus.

Putin nuk e ka dashur kurrë ditëlindjen e tij. Kulti i personalitetit që është krijuar me kalimin e kohës rreth figurës së tij nuk përfshin festime madhështore.

“Vështirë se i kam hapur ndonjëherë dhuratat”, ka shkruar ai në autobiografinë e tij.

Protokolli parashikon që ai mund të mbajë për vete vetëm objekte që vlejnë më pak se 10 mijë rubla, 164 euro.

Ai vetë tregon për nervozizmin e tij kur në vitin 2002 gjashtëdhjetë argjendarë Uralë, të financuar nga disa oligarkë, krijuan një kopje 10 milionë euro të kurorës ceremoniale që u përdor për shenjtërimin e carëve.

Në atë kohë, presidenti rus nuk kishte asnjë interes të kalonte si autokrat.

Kohët ndryshojnë. Dhe janë ditëlindjet ato që e tregojnë këtë.

Nga ato të kaluarat me Gerard Schröder-in dhe Silvio Berlusconin-in, të cilët në vitin 2017 i dërguan mbulesën e famshme të shtratit me imazhin e të dyve duke shtrënguar duart mbi të.

Në vitin 2015, 63-vjeçari doli në fushë në Pallatin e Sportit të Sochi-t për një ndeshje me lojtarë profesionistë hokej.

Këngëtari Denis Maydanov, i cili ishte në kulmin e popullaritetit në atë kohë, ashtu si Putin, drejtoi turmën duke kënduar “Bashkohuni për Carin tonë”.

Alternativa e formulës “presidenti e kaloi ditëlindjen duke punuar në tryezën e tij” ka qenë gjithmonë një festë në “dashën” (shtëpia e dytë në fshat tipike) ruse.

Peshkimi, gjuetia, kthimi në natyrë.

E bëri këtë në 2014, 2019 dhe 2020, gjatë mbylljes nga COVID-19.

Dhe këtu fillojnë dallimet e mëdha me të tashmen.

Nuk bëhet fjalë vetëm për izolim, për një darkë në Shën Petersburg me urimet e atyre që ai vetë nuk do t’i gjykonte në nivelin e tij, si Lukashenko dhe Ramon.

Gjatë ekskursioneve të tanishme, shoqëruesi i vetëm i presidentit ishte Sergei Shoigu, Ministri i Mbrojtjes sot objekt dhe objektiv i mospajtimit që kërcënon të minojë pushtetin vertikal të Putin-it.

Ishte pra një ditëlindje e zbehtë kjo e Putin, e imponuar nga vetë presidenti.

I vetmi që theu këtë ishte Kadyrovi, i cili në Çeçeninë e tij i kushtoi Putinit titullin e një gare me kuaj, një garë makinash, hapjen e një qendre olimpike të xhudos, një ndërtesë të re qeveritare ende për t’u ndërtuar.

Ndoshta kjo është gjithashtu një shenjë.

Dje në orët e vona të pasdites, nxënës shkolle me përparëse të bardhë u dërguan në Sheshin e Kuq për të kënduar një kor urimesh.

Frynte një erë që të priste fytyrën.

Për t’u mbrojtur vajzat i kënduan dritave të dyqanit përballë.

Pas tyre, Kremlini ishte zhytur në errësirë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.