Blinken do të paralajmërojë Kinën për eksportet e armëve në Rusi

Sekretari amerikan i shtetit Antony Blinken do të paralajmërojë Kinën se SHBA do të ndërmarrë hapa ndëshkues nëse nuk ndalon dërgimin e teknologjisë së armëve në Rusi, pasi Washingtoni konsideron vendosjen e sanksioneve ndaj institucioneve financiare kineze.

Gjatë një vizite në Kinë javën e ardhshme, Blinken do t’u tregojë homologëve të tij se SHBA dhe aleatët e saj po bëhen gjithnjë e më të padurueshëm me refuzimin e Pekinit për të ndaluar ofrimin e Moskës me gjithçka, nga çipat te motorët e raketave lundruese për të ndihmuar në rindërtimin e bazës së saj industriale.

Blinken nuk planifikon të zbulojë se çfarë masash do të marrë SHBA, por disa njerëz të njohur me situatën thanë se po shqyrton sanksione ndaj institucioneve financiare kineze dhe subjekteve të tjera.

Një person tha se mesazhi i tij do të ishte paralajmërimi më i qartë që SHBA ua kishte dërguar personalisht zyrtarëve kinezë.

SHBA në javët e fundit ka rritur paralajmërimet e saj për situatën, duke përfshirë takimet me aleatët evropianë dhe G7.

Në një intervistë, zëvendëssekretari i shtetit Kurt Campbell tha se Kina po minon sigurinë evropiane duke furnizuar Rusinë me teknologji me përdorim të dyfishtë në të njëjtën kohë me përpjekjet për të zhvilluar lidhje më të ngushta ekonomike dhe politike me Evropën.

“Ajo që ne jemi përpjekur të nënvizojmë me bashkëbiseduesit evropianë dhe kinezë është se këto objektiva të dyfishta janë të paqëndrueshme dhe se ne duam që Kina të mendojë me shumë kujdes për rrugën përpara”, tha ai.

Campbell tha se SHBA po tregohej “shumë e drejtpërdrejtë” në lidhje me shqetësimet e saj dhe do ta “mbante Kinën përgjegjëse” për veprimet e saj.

Blinken do të vizitojë Kinën nga 24 deri më 26 prill dhe do të zhvillojë takime në Shangai dhe Pekin. Campbell tha se Blinken do ta ngrejë çështjen me ministrin e jashtëm kinez Wang Yi.

Një zyrtar amerikan tha se anëtarët e tjerë të G7 i kishin thënë Uashingtonit se kishin, ose do ta ngrinin çështjen me Kinën pas një takimi të ministrave të jashtëm të G7 në Capri këtë javë, ku Blinken diskutoi këtë çështje.

Një person tha se Kina ishte bërë gjithnjë e më e shqetësuar për mundësinë e sanksioneve ndaj bankave të saj. Presidenti Joe Biden lëshoi një urdhër ekzekutiv në dhjetor duke paralajmëruar institucionet e huaja financiare se ata “rrezikojnë të humbasin aksesin në sistemin financiar të SHBA nëse lehtësojnë transaksione të rëndësishme në lidhje me bazën industriale ushtarake të Rusisë”.

“Kina ka qenë e shqetësuar për disa kohë se SHBA mund të rrisë sanksionet ndaj Kinës, veçanërisht në fushën bankare, për shkak të mbështetjes së saj ndaj Rusisë gjatë luftës”, tha Dennis Wilder, një ish analist i CIA-s për Kinën tani në Universitetin Georgetoën.

Katër huadhënësit kryesorë kinezë ndaluan në mënyrë selektive pranimin e pagesave nga Rusia muajin e kaluar, sipas raporteve të mediave ruse, veçanërisht në lidhje me transaksionet për komponentët elektronikë kritikë.

Departamenti Amerikan i Shtetit nuk pranoi të komentojë.

Sekretarja e Thesarit Janet Yellen e ngriti çështjen gjatë një vizite në Kinë këtë muaj, por Blinken synon ta shtyjë çështjen në terma më të fortë. Biden i shprehu shqetësim presidentit kinez Xi Jinping kur liderët folën me telefon tre javë më parë.

Campbell tha se ishte “shumë herët për të thënë nëse Kina po rivlerëson qëndrimin dhe pozicionin e saj në lidhje me Rusinë dhe luftën në Ukrainë” pas një valë paralajmërimesh nga Uashingtoni.

Ndërsa SHBA shpreson se kërcënimi i masave ndëshkuese do ta bindë Kinën të ndryshojë kursin, ajo gjithashtu po u kërkon vendeve evropiane të ndërmarrin veprime. SHBA beson se presioni evropian është kritik pasi Kina është e shqetësuar për ndikimin në marrëdhëniet e saj ekonomike me Evropën pasi ekonomia e saj ngadalësohet.

Një person i njohur me diskutimet tha se Evropa kishte vendosur sanksione vetëm ndaj tre grupeve kineze që nga fillimi i pushtimit rus dy vjet më parë, në krahasim me 100 veprime të tilla kundër subjekteve kineze nga Uashingtoni.

Zyrtarët e lartë amerikanë publikuan javën e kaluar një listë të teknologjive që ata thanë se Kina po i dërgonte Rusisë.

Në vitin 2023, thanë ata, 90 për qind e çipave që importonte Rusia vinin nga Kina dhe po përdoreshin për të prodhuar raketa, tanke dhe avionë. Ata thanë se 70 për qind e importeve ruse të makinerive në tremujorin e fundit të vitit të kaluar ishin nga Kina dhe ishin “me gjasa të përdorura” për të prodhuar raketa balistike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.