“S’komentojmë mbi konsultimet bilaterale”, Ministria e Mbrojtjes e Gjermanisë për raportimin e AP-së se Donika Gërvalla kërkoi largimin e Jorn Rohde-s nga Kosova
![](https://albanianpost.com/wp-content/uploads/2024/02/top-top.jpg)
Ministria e Mbrojtjes e Gjermanisë nuk ka dashur ta komentojë rastin, kur është pyetur nga Albanian Post për raportimin se Donika Gërvalla ka kërkuar nga ministri Boris Pistorius që shteti gjerman ta largojë nga Kosova ambasadorin Jorn Rohde.
Një zëdhënës i ministrisë së mbrojtjes fillimisht ka thënë se duhet të marrë informacione shtesë rreth pyetjes.
“Do të mbledh informacionin e nevojshëm dhe do të japim një përgjigje”, ka deklaruar zëdhënësi i ministrisë.
Në përgjigjen e dytë, zëdhënës i ministrisë ka shkruar se nuk duan ta komentojnë situatën.
“Ministria e Mbrojtjes së Gjermanisë nuk komenton mbi konsultimet bilaterale”, thuhet në përgjigjen e përcjellur me e-mail nga ministria për AP-në.
Përafërsisht të njëjtën përgjigje ka thënë edhe zëdhënësi i Ambasadës së Gjermanisë në Kosovë, Christian Bottcher, i pyetur nga Gazeta Express.
“Ne nuk komentojmë për këto raportime”, ka thënë Bottcher.
Në anën tjetër, vetë Donika Gërvalla fillimisht nuk reagoi, por më pas shkroi shkurt në Facebook se “pretendimi që kinse paskam kërkuar largimin e ambasadorit gjerman Rohde është sa i pavërtetë, aq edhe absurd”.
Çfarë raportoi Albanian Post?
Me 19 shkurt AP raporti ekskluzivisht se Zëvendës-kryeministrja e Kosovës dhe Ministrja e Punëve të Jashtme, Donika Gërvalla, ka kërkuar nga Gjermania që ta largojë nga Kosova ambasadorin aktual të Gjermanisë në Kosovë, Jorn Rohde.
Një burim brenda MPJ-së së Kosovës dhe një tjetër brenda Ambasadës së Gjermanisë në Kosovë, kanë bërë të ditur për Albanian Post se kërkesa e Gërvallës u bë në vizitën e fundit të saj në Berlin, ku përveç takimit me kryetarin e Komisionit për Punë të Jashtme të Gjermanisë, Michael Roth, pati takim edhe me Ministrin e Mbrojtjes të Gjermanisë, Boris Pistorius.
Në takimin e 31 janarit me Pistorius, para vizitës së këtij të fundit në Prishtinë, Gërvalla ka shprehur ankesat e saj për Rohde-në dhe punën e tij në Kosovë.
Të njëjtat burime kanë sqaruar se Gërvalla është ankuar që diplomati që përfaqëson Gjermaninë në Kosovë “po ndërhynë/përzihet shumë” dhe se po shkruan shumë në platformën “X”.
“Po shkruan për çështje që nuk i takojnë dhe do të duhej të largohej nga Kosova”, ka qenë kërkesa e Donika Gërvallës.
Por, Rohde nuk është i vetmi gjerman për të cilin është ankuar Gërvalla.
Duke qenë edhe vetë shtetase gjermane, ajo më shumë si qytetare e Gjermanisë e më pak si diplomate e Kosovës, ka shprehur opinionet e saj negative edhe për të dërguarin e Gjermanisë për Ballkanin Perëndimor, Manuel Sarrazin.
Gërvalla, po ashtu ka folur për Jens Plotner, këshilltarin e Kancelarit gjerman, Olaf Scholz.
Për Plotner, një nga njerëzit kryesor i angazhuar në hartimin e Planit Franko-gjerman nga i cili buroi Marrëveshja Bazike e nënshkruar mes Kosovës dhe Serbisë, Gërvalla ka thënë se po përfshihet shumë në politikën e jashtëm të Gjermanisë për Kosovën dhe e ka amortizuar krejtësisht MPJ-në e Gjermanisë.
Gërvalla ka thënë se me homologen e saj, Annalena Baerbock, ka raporte të mira, por është ankuar se Plotner s’po i lë hapësirë ministres dhe kështu po e udhëheqë politikën e jashtme të Gjermanisë në raport me Kosovën dhe Ballkanin Perëndimor nga Kancelaria.
Albanian Post gjithashtu ka konfirmuar se ambasadori gjerman Rohde është në dijeni të kërkesës së Gërvallës për ta larguar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com