![](https://albanianpost.com/wp-content/uploads/2023/09/radiojjj.jpg)
Ekipi i Albanian Post ka qëndruar këtë të mërkure në vendin ku ishte fshehur krimineli dhe terroristi, Milan Radojiçiç, pas sulmit terrorist ndaj Policisë së Kosovës, konkretisht brenda hapësirave të Manastirit të Banjskës në Zveçan
Në këtë vend, nënkryetari i Listës Serbe, terroristi Radojiçiç, së bashku me disa kriminelë tjerë – të armatosur rëndë – kishin qëndruar para se të largoheshin për në Serbi.
Siç raporton gazetari i AP-së, aktualisht rruga që të shpie për në fshatin Banjskë të Zveçanit është liruar plotësisht për qarkullim, mirëpo forca të shumta të njësisë speciale të Kosovës janë duke qëndruar ende aty.
![Mund të jetë një imazh i 3 persona](https://scontent.fprn4-1.fna.fbcdn.net/v/t39.30808-6/383231117_821653563299105_6538089703025552941_n.jpg?_nc_cat=102&ccb=1-7&_nc_sid=49d041&_nc_ohc=J3SPqxyPa80AX_z5JaF&_nc_ht=scontent.fprn4-1.fna&oh=00_AfCcnzdLrrh5Dakn-2GJVoprDUgEdcS5zx2M-tcaXdHxwg&oe=65198587)
Këtë e ka konfirmuar edhe Zëvendësdrejtori i Policisë së Kosovës për rajonin e Veriut, Veton Elshani.
Në një prononcim për AP, nga Banjska, Elshani ka thënë se hetimet për sulmin terrorist nuk do të përfundojnë edhe për një kohë të gjatë, teksa ka shtuar se bastisjet nëpër zonën e banimit kanë përfunduar.
“Hetimet nuk kanë me përfunduar edhe një kohë të gjatë sepse edhe për neve është interesant pse me u zgjedh ky vend në këtë formë dhe çka ka qenë qëllimi i këtyre njerëzve të armatosur”, tha Elshani.
Në pamjet e marra nga AP, shihet një kamion i dëmtuar gjatë ngjarjeve të së dielës.
Për më shumë detaje, më vonë do të ndiqni një reportazh të zgjeruar nga AP.
Ndërsa, pjesëmarrja e Radojiçiç-it në sulmin terrorist ndaj Policisë së Kosovës, u vërtetua përmes disa pamjeve që i publikoi të martën Ministri i Punëve të Brendshme, Xhelal Sveçla.
Sulmin terrorist ndaj Policisë së Kosovës e kanë dënuar të gjitha vendet perëndimore, përfshirë Shtetet e Bashkuara të Amerikës dhe Bashkimin Evropian, teksa kanë kërkuar që përgjegjësit të dalin para drejtësisë.
Çka ndodhi të dielën e 24 shtatorit në Veri?
Në fshatin Banjskë të Zveçanit, më 24 shtator ndodhën sulme terroriste ndaj Policisë së Kosovës, ku u vra polici Afrim Bunjaku, u plagos polici Alban Rashiti si dhe u lëndua një tjetër.
Pas kësaj Policia e Kosovës reagoi duke kërkuar nga terroristët të dorëzohen, ata refuzuan të dorëzohen duke vazhduar sulmet me armë ndaj policisë.
Nga gjuajtjet me armë zjarri, katër terroristë u vranë, dy janë arrestuar, dhe katër persona tjerë janë arrestuar për përfshirje.
Lidhur me sulmet terroriste, Policia ka sekuestruar arsenal armësh në Zveçan, të cilat u publikuan gjatë ditës së hënë.
Sveçla: Gjetëm dokumente të Radojiçiç-it, dëshmojnë pjesëmarrjen e tij në sulmin ndaj policëve
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com