AAK mbledh nënshkrimet për të kontestuar kërkesën e LVV-së për ndryshim të mënyrës së votimit

Deputetja e Aleancës për Ardhmërinë e Kosovës, Time Kadrijaj, pas dështimit të konstituimit të Kuvendit të Kosovës ka thënë se i kanë mbledhur nënshkrimet dhe se do ta kontestojnë në Gjykatën Kushtetuese kërkesën e Lëvizjes Vetëvendosje për ndryshim të mënyrës së votimit për zgjedhjen e kryetarit të Kuvendit nga e hapur në votim të fshehtë.

Krasniqi: Kosova ndodhet në një situatë të paprecedentë

Kryetari i Partisë Demokratike të Kosovës, Memli Krasniqi, pas dështimit për të 13-tën herë të konstituimit të Kuvendit të Kosovës, vlerësoi se Kosova po ndodhet në një situatë të paprecedentë, për të cilën fajësoi Lëvizjen Vetëvendosje.

“Po bëhen tre muaj që vullneti i qytetarëve është duke u dhunuar nga qasja e Lëvizjes Vetëvendosje. Është vështirë të gjenden fjalë për ta përshkruar këtë situatë”, tha Krasniqi.

Ai theksoi se PDK-ja mbetet e përkushtuar për të dalë nga bllokada institucionale, duke kërkuar zgjidhje për zgjedhjen e kryesisë së Kuvendit.

“E shprehim vullnetin tonë të konfirmuar për të insistuar që të dalim nga kjo bllokadë që na ka sjellë LVV-ja. Haxhiu nuk i ka votat. Ne do të jemi këtu, por do ta kemi qëndrimin e njëjtë – të ndërrohet kandidati,” përfundoi Krasniqi.

Krasniqi ndër të tjera tha se partia e tij do ta shqyrtojë propozimin e AAK-së që t’i drejtohen Gjykatës Kushtetuese për të vlerësuar kushtetshmërinë e situatës në Kuvend.

“Nuk e kam parë lëndën. Sapo u njoftova. Kemi ekspertizën e duhur për të vlerësuar a duhet të dërgohte diçka në Kushtetuese. Do ta shqyrtojmë. Do ta marrë mendimin e ekspertëve”, tha Krasniqi.

Bajrami: Do të dorëzojmë kërkesë për anulimin e vendimit për shtrenjtimin e rrymës

Deputetja e Lidhjes Demokratike të Kosovës, Hykmete Bajrami, ka njoftuar se në seancën konstituive të Kuvendit të Kosovës, ka nisur mbledhja e nënshkrimeve të disa deputetëve për të dorëzuar një kërkesë te Zyra e Rregullatorit të Energjisë për anulimin e dy vendimeve të këtij institucioni.

“Anulimin e vendimit për të hyrat maksimale të lejuara për operatorët e energjisë elektrike, e cila ka rezultuar me ngritjen e çmimit të energjisë elektrike dhe gjithashtu vendimin tjetër për detyrimin e mbi 1 mijë bizneseve për të dalë në tregun e lirë të energjisë elektrike”, tha ajo, pas dështimit për të 13-të herë të konstituimit të Kuvendit të Kosovës.

As në herën e 13-të nuk zgjidhet kryekuvendari

Kryesuesi i seancës konstituive të Kuvendit të Kosovës, Avni Dehari, ka përmbyllur seancën konstituive të Kuvendit të Kosovës në mungesë të kuorumit, meqë vetëm 56 deputetë votuan për që të ndryshojë metoda e votimit nga e hapur në atë të fshehtë për kryekuvendar.

Dehari propozoi që edhe në përpjekjen e 13-të të konstituimit të Kuvendit të Kosovës të vazhdohet me votim të fshehtë për të zgjedhur kryekuvendarin.

Në vazhdimin e 13-të të seancës konstituive, Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe Lista Serbe kanë refuzuar sërish që të propozojnë një përfaqësues që do të siguronte mbarëvajtjen e votimit të fshehtë.

Seanca e radhës do të mbahet më 11 maj në orën 10:00.