Sekuestrohen mjete të mprehta dhe boksa metalikë nga shitësit ambulantë në Pejë

Policia e Kosovës, në bashkëpunim me inspektorët e tregut, ka sekuestruar një sasi të konsiderueshme të mjeteve të mprehta dhe mjeteve të tjera të rrezikshme nga shitësit ambulantë në “Qarshinë e Gjatë” në Pejë.

Sipas njoftimit të Policisë, gjatë aktiviteteve policore të zhvilluara më 5 gusht 2026, në këtë lokacion janë vërejtur shitës ambulantë duke tregtuar mjete të mprehta, boksa metalikë dhe mjete të tjera.

Në vazhdim të këtij aktiviteti, më 12 gusht, inspektorët e tregut, me asistimin e zyrtarëve policorë të Stacionit Policor në Pejë, kanë kryer kontrolle ndaj shitësve ambulantë.

Gjatë kontrollit, duke respektuar procedurat ligjore, janë gjetur dhe sekuestruar: 86 mjete të mprehta (briskë); 19 boksa metalikë; 2 shufra metalike; 3 patrulla thike.

Policia ka bërë të ditur se aktiviteti është zhvilluar në bashkëpunim me inspektorët e tregut dhe në përputhje me procedurat ligjore.

“Mos rrej”, përplasja Gërvalla-Deliu

Deputetja e PDK-së, Blerta Deliu-Kodra, ia ka ndërprerë fjalën ministres në detyrë të Drejtësisë, Donika Gërvalla, dhe nuk e ka lejuar të vazhdojë fjalën e saj.

“Pse nuk vini në takim?”, i ka thënë Gërvalla, Deliut-Kodrës. Më pas, Gërvalla u ka thënë deputetëve të PDK-së që të “mos rrejnë”, teksa ka ndërhyrë edhe deputeti i PDK-së, Artan Behrami.

Gërvalla është quajtur “mashtruese” nga personat që ndodheshin prapa saj.

Komandanti i Forcës së Sigurisë së Kosovës (FSK), gjenerallejtënant Bashkim Jashari, ka pritur në takim Adjutantin e Përgjithshëm të Gardës Kombëtare të Ajovës, gjeneralmajor Stephen E. Osborn.

Gjatë takimit, Jashari e ka falënderuar Osborn për vizitën dhe bashkëpunimin e vazhdueshëm ndërmjet FSK-së dhe Gardës Kombëtare të Ajovës.

Palët diskutuan për bashkëpunimin e deritanishëm, projektet dhe aktivitetet e përbashkëta, si dhe për mundësitë e avancimit të mëtejshëm të partneritetit ndërmjet dy forcave.

Në takim u diskutua edhe për zhvillimet aktuale të sigurisë dhe rëndësinë e bashkëpunimit ndërmjet partnerëve.

Gjatë vizitës, gjeneralmajor Osborn vizitoi edhe Njësinë e Operacioneve Speciale të FSK-së, ku u njoh nga afër me kapacitetet, zhvillimin dhe aktivitetet e kësaj njësie.

Në përfundim, Jashari shprehu mirënjohjen për Gardën Kombëtare të Ajovës për mbështetjen dhe bashkëpunimin e vazhdueshëm, duke vlerësuar partneritetin e ndërtuar ndër vite dhe angazhimin e përbashkët për forcimin e paqes dhe sigurisë.

Policia e Kosovës ka realizuar 71 urdhëresa të gjykatës gjatë javës së kaluar në rajonin e Prishtinës, në lokacione të ndryshme dhe përmes aksioneve të ndara. Sipas policisë, 39 prej urdhëresave kanë qenë për vepra penale, ndërsa pjesa tjetër për kundërvajtje, seanca gjyqësore, verifikime dhe raste të tjera.

Në përputhje me urdhëresat e gjykatës, pas përfundimit të procedurave policore, personat e dënuar me burgim janë dërguar për vuajtje të dënimit. Ndërkaq, personat e dënuar me gjobë janë liruar pasi kanë përmbushur obligimet e përcaktuara në urdhëresat gjyqësore.

Aktivitetet policore gjatë javës së kaluar nuk janë kufizuar vetëm në realizimin e urdhëresave të gjykatës.

Në kuadër të veprimeve për rritjen e sigurisë, në rajonin e Prishtinës janë sekuestruar edhe 16 armë zjarri.

Po ashtu, gjatë së njëjtës periudhë, Policia ka shqiptuar 4 mijë e 406 gjoba për kundërvajtje dhe shkelje të ndryshme të rregullave të komunikacionit.

Prej tyre, 604 masa administrative janë evidentuar përmes veturave inteligjente dhe veturave me radar mobil.