Hovenier për terroristët: Ka qenë grup i organizuar dhe i trajnuar, s’mund të flas për pasojat që e presin Serbinë

Ambasadori i Shteteve të Bashkuara të Amerikës (SHBA), Jeff Hovenier, ka deklaruar para mediave se sulmi i ndodhur të dielën e 24 shtatorit në Veri ka qenë sulm “serioz” dhe “i rëndë”, e që akoma vazhdon të jetë i panjohur.

Hovenier, në një deklaratë për mediat pas takimit me presidenten e Kosovës, Vjosa Osmani ka thënë se s’mund të flas për pasojat që do e presin Serbinë pas këtij veprimi.

Teksa ka sqaruar se janë duke u përpjekur që të kuptojnë atë se cfarë ka ndodhur.

“Serbia nuk ka reaguar fare pas asaj që ka ndodhur, s’mund të flas për pasojat tani për tani. Kjo ka ndodhur 48-orë më parë dhe akoma po përpiqemi të kuptojmë se çfarë ka ndodhur saktësisht, ka disa fakte që i dimë dhe disa të tjera që nuk i dimë të jemi të sinqertë për këtë”, ka thënë Hovenier para gazetarëve.

“Sulmi erdhi nga grupe të organizuara mirë dhe të trajnuar mirë”

Ai tutje ka thënë se janë duke punuar për të kuptuar atë se çfarë ka ndodhur, duke e vlerësuar se ka qenë një grup i organizuar dhe i trajnuar mirë.

“Ka qenë një sulm shumë i madhë dhe SHBA-ja është duke punuar ngushtë me Kosovën për të ardhur tek njëri kuptim se çfarë ka ndodhur. E di që ka qenë sulm, e di që është i organizuar mirë nga një grup i organizuar mirë dhe i trajnuar mirë dhe që kanë pajisje ushtarake”.

Hovenier, shtoi se janë duke punuar që i gjithë rasti të zbardhet, por që nuk është e lehtë.

“Ende jemi duke bërë një punë të zellshme si ka qenë kjo e mundur, por duhet t’i ruajmë energjitë dhe të gjitha pajisjet që janë sekuestruar dhe planin që jemi duke e zhvilluar dhe në sulm s’ishte një grup i qytetarëve, ky ishte një grup i trajnuar dhe i organizuar dhe këtu ka qenë edhe dikush që i ka pajisur me armatim të rëndë”, deklaroi ai.

Ambasadori, theksoi se Serbia ka vazhduar të paralajmëroj sulme të tjera, edhe pas kësaj situate.

“E dimë që disa prej sulmuesve kanë vrarë disa policë të Kosovës dhe janë vrarë edhe disa prej sulmuesve, por gjithashtu autoritetet serbe thanë se ata kanë humbur forcën dhe do të përdorin këtë për të nisur edhe sulme të tjera”.

“Dëshirojmë që marrëveshjet mes Kosovës dhe Serbisë të zbatohen”

Ai është pyetur nga gazetarët se a kanë qenë të informuar për ndonjë sulm të tillë, gjë të cilën e mohoi duke thënë se “askush nuk do të dëshironte të shihte policin e Kosovës ta humbiste jetën”.

“Si çështje politike nuk dëshirojmë të komentojmë në çështje të inteligjencës. Në rast se do ishim të informonim do të bënin gjithçka për ta shmangur, askush nuk do të dëshironte ta shihte rreshterin Bunjaku që ta humbiste jetën nga kjo”.

Tutje, ai e përshkroi situatën aktuale si “të ndjeshme”, duke potencuar se do të vazhdojnë të angazhohen për të arritur në zbatimin e marrëveshjeve mes Kosovës dhe Serbisë.

“Situata është shumë sensitive, është me rëndësi që puna të kryhet për t’i normalizuar marrëdhëniet mes Kosovës dhe Serbisë dhe të angazhohen në dialogun e lehtësuar që të arrihet zbatim i plotë nga të dyja palët pasi ne duam të shohim që Marrëveshja e Ohrit të zbatohet”.

“Ne dëshirojmë që këto marrëveshje të zbatohen në plotni nga të dyja palët dhe ne jemi duke punuar”.

Çka ndodhi të dielën e 24 shtatorit në Veri?

Në fshatin Banjskë të Zveçanit, më 24 shtator ndodhën sulme terroriste ndaj Policisë së Kosovës, ku u vra polici Afrim Bunjaku, u plagos polici Alban Rashiti si dhe u lëndua një tjetër.

Pas kësaj Policia e Kosovës reagoi duke kërkuar nga terroristët të dorëzohen, ata refuzuan të dorëzohen duke vazhduar sulmet me armë ndaj policisë.

Nga gjuajtjet me armë zjarri, katër terroristë u vranë, dy janë arrestuar, dhe katër persona tjerë janë arrestuar për përfshirje.

Lidhur me sulmet terroriste, Policia ka sekuestruar arsenal armësh në Zveçan, të cilat u publikuan gjatë ditës së hënë.

Më 26 shtator, Sveçla publikoi edhe një video të incizuar me dron, ku pretendohet se shihet Radoiçiçi i armatosur në Banjskë.

Lista Serbe partia që ka mbështetjen e Beogradit e as institucionet në Serbi nuk kanë reaguar lidhur me akuzat e Kosovës për përfshirjen e pretenduar të Radoiçiçit.

Sveçla: Gjetëm dokumente të Radojiçiç-it, dëshmojnë pjesëmarrjen e tij në sulmin ndaj policëve

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.