Nis takimi Kurti-Vuçiç

Ka filluar takimi në mes të kryeministrit kosovar, Albin Kurti, dhe presidentit serb, Aleksandër Vuçiç, me ndërmjetësimin e Bashkimit Evropian, përkatësisht Përfaqësuesit të Lartë të BE-së për Politikë të Jashtme dhe Siguri, Josep Borrell, si dhe të Dërguarit Special të BE-së për dialogun Kosovë-Serbi, Miroslav Lajçak.

Takimet në Bruksel këtë të enjte kanë filluar nga që nga ora 9:00.

Para takimit trelateral, fillimisht zyrtarët evropianë janë takuar me presidentin serb, Vuçiç dhe më pas me kryeministrin Kurti.

Pas takimin me Borrell-in dhe Lajçak-un, është lajmëruar presidenti serb Vuçiç.

Përmes një postimi në Facebook, Vuçiç teksa njoftoi për takimin me përfaqësuesit evropianë, shkroi se “bisedimet e vështira në Bruksel sapo kanë filluar”.

Në takimin e fundit në Bruksel, Vuçiç dhe Kurti nuk u ulën në të njëjtën tryezë.

Një fjalim i Josep Borrell u njoftua midis orës 15:00 dhe 18:00.

Siç u tha më herët, temat e takimit janë zbatimi i Marrëveshjes për rrugën drejt normalizimit dhe aneksit për zbatimin e marrëveshjes.

Ky takim në mes të Kurtit dhe Vuçiç-it është i pari pas më shumë se katër muajsh.

Kosova dhe Serbia ishin dakorduar për Marrëveshjen Bazë për normalizimin e marrëdhënieve, fillimisht në Bruksel më 27 shkurt, dhe e përforcuar me planin e zbatimit në Ohër të Maqedonisë së Veriut më 18 mars.

Mirëpo, tensionet e krijuara në Veriun e Kosovës që nga 26 maji e kishin lënë në hije zbatimin e saj.

Prandaj, edhe ky takim është në këtë kontekst; që palët të zbatojnë atë që e kanë pranuar.

Marrëveshja e pranuar nga Kryeministri i Kosovës, Albin Kurti, dhe Presidenti i Serbisë, Aleksandër Vuçiç, përmbante 11 nene.

Aty Kosova – pos tjerash – pranonte që t’i zbatonte të gjitha marrëveshjet e arritura me herët, përfshirë edhe Asociacionin e Komunave me Shumicë Serbe dhe pajtimin për një status special për Kishën Ortodokse Serbe.

Serbisë i kërkohej që të mos e pengonte anëtarësimin e Kosovës në organizatat ndërkombëtare dhe përgjithësisht njëfarë njohje de-facto të shtetësisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.