![](https://albanianpost.com/wp-content/uploads/2022/06/239363835_4405673562826479_5173220055083541412_n-2.jpg)
Prokuroria Themelore në Ferizaj, Departamenti i Krimeve të Rënda, ka bërë të ditur se ka ngritur aktakuzë kundër të pandehurve Dardan Krivaqës dhe Arbër Sejdiut, të cilët gjenden në paraburgim nga muaji gusht 2021, lidhur me rastin e vrasjes së Marigona Osmanit.
Sipas aktakuzës së Prokurorisë, me datë 22 Gusht 2021, të pandehurit Dardan Krivaça dhe Arbër Sejdiu, me dashje dhe në bashkëkryerje e privojnë nga jeta tani të ndjerën Marigona Osmani, me çka në bashkëkryerje kryejnë veprën penale “Vrasja e rëndë”.
Sipas Prokurorisë, gjithashtu për të pandehurin Dardan Krivaqa, ekziston dyshimi i bazuar se i njëjti ka kryer veprën penale “Dhunimi”.
“Ndërsa, i pandehuri Arbër Sejdiu, me dashje i ka ndihmuar të pandehurit Dardan Krivaça, në kryerjen e veprës penale të dhunimit, me çka kreu veprën penale ndihmë në kryerjen e dhunimit nga neni 227 paragrafi 4 nënparagrafi 4.1 lidhur me paragrafin 1 dhe nenin 33 të KPRK-së”, thuhet në njoftimin për media.
![](https://albanianpost.com/wp-content/uploads/2022/05/Foto-e-Gjykates-680x377-1.jpg)
Prokuroria Themelore në Ferizaj, me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtorë për veprat penale për të cilat akuzohen dhe të dënohen sipas ligjit.
Mw 11 maj, Gjykata Themelore në Ferizaj, kishte shpallur aktgjykim dënues ndaj të pandehurit Dardan Krivaqa prej tetë muaj, sipas aktakuzës së Prokurorisë Themelore në Ferizaj, për shkak të veprës penale “detyrim”.
Ndryshe, Gjykata Themelore në Ferizaj më 25 gusht kishte aprovuar kërkesën e Prokurorisë Themelore të Ferizajt, për caktimin e masës së paraburgimit për një muaj, kundër të pandehurit Dardan Krivaqës, për shkak të dyshimit të bazuar se në bashkëkryerje ka kryer veprën penale vrasje e rëndë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com