Finlandezi Valtteri Bottas ka nënshkruar kontratë disa vjeçare me Alfa Romeo-n.
Bomba e ditës erdhi gjatë mëngjesit të ditës së sotme, menjëherë pas garës në Zandzvoort të Holandës.
Bottas do të kalojë te Alfa Romeo nga Mercedes-i, qysh në fund të këtij sezoni.
Finlandezi do të jetë zëvendësues i bashkëkombasit të tij, Kimi Raikkonen, i cili do të pensionohet nga Formula 1 këtë vit.
Me rregullat e reja, ende është herët për të thënë se në çfarë niveli do të jetë Alfa Romeo, por sigurisht pritet që konkurrenca nga sezoni i ardhshëm të jetë më e lartë, me diferencën mes skuadrave më të vogël.
Alfa Romeo ende nuk ka vendosur për skuadrën e plotë për vitin 2022.
Antonio Giovinazzi ende nuk e ka të sigurt vazhdimin me skuadrën, dhe vendimi pritet të merret së shpejti.
Sa i përket Mercedes-it, pritet që nga sezoni i ardhshëm në ulësen e argjendtë të ulet fantazisti George Russell.
Se sa do i pëlqej kjo yllit të skuadrës gjermane, Lewis Hamilton, mbetet për t’u parë…
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
