Lajm i mirë për të gjithë adhuruesit e festivaleve sepse një nga më të mëdhenjtë, ai i “Coachella-s” do të mbahet në muajin prill të vitit 2022.
“Goldenvoice” e cila meret me organizimin dhe promovimin e këtij festivali, ka zbuluar datën për rikthim pas dy vjetësh pauzë, si pasojë e pandemisë me COVID-19.
Vitin e ardhshëm, festivali do të zhvillohet nga data 15 prill deri më 24 prill, teksa biletat do të dalin në shitje që nga data 4 qershor e këtij viti.
“Coachella” fillimisht ishte planifikuar të mbahet në prillin e këtij viti por me vendimin e grupit organizativ, në muajin janar u njoftua anulimi i evenimentit.
Festivali i muzikës nuk ishte mbajtur as në vitin 2020, ani pse këngëtarët më me nam ishin rezervuar të performonin në skenën gjigande të tij, përfshirë këtu; Travis Scott, Rage Against the Machine e Frank Ocean.
Madje, për “Coachella-n” e vitit 2020 ishte planifikuar edhe një performancë surprizë nga ikona e muzikës pop, Lady Gaga.
“Coachella” nuk është festivali i vetëm i cili ka lajmëruar rikthim.
Pos këtij festivali, rikthim kanë shënuar edhe evenimentet e tjera të cilat do të mbahen gjatë këtij viti, të tilla si “Lollapaloza”,”Bonnaroo”, “Festivali i muzikës Pitchfork” si dhe “Gov Ball”.
Ndërsa, festivalet që kanë paralajmëruar mbajtje gjatë vitit të ardhshëm janë – “Primavera Sound” dhe “Glastonbury”.
Ndryshe, festovali i “Coachella-s” mbahet në “Empire Polo Club” në Indio të Californias, saktësisht në Luginën Coachella në “Shkretëtirën e Kolorados”.
Festivali ishte bashkë-themeluar nga Paul Tollett dhe Rick Van Santen në vitin 1999 dhe organizohet nga “Goldenvoice”, një filial i “AEG Presents”.
Ngjarja përfshin artistë muzikorë nga shumë zhanre të muzikës, duke përfshirë muzikën rock, pop, indie, hip hop dhe elektronike të vallëzimit, si dhe instalime arti dhe skulptura.