Ministri i Shëndetësisë, Arben Vitia dhe politikani serb Aleksandar Arsenijeviç, u takuan në fund të muajit tetor të vitit 2023.

Përmes disa video-incizimeve të cilat i ka siguruar mediumi “Betimi për Drejtësi”, Vitia dhe Arsenijeviç janë parë në njërën nga kafiteritë e Mitrovicës së Veriut, të dy kur pyeten përse u takuan japin arsyetime të ndryshme.

Në njërën anë, Vitia thotë se u takuan për çështje që i takojnë shëndetësisë, por Arsenijeviç thotë se takimi i tyre s’kishte të bënte me çështje që lidhen me shëndetësinë.

“Jemi takuar ka ardhur në rrugë aty ka qenë kemi bërë muhabet se sa është e rëndësishme kjo pjesa e shëndetësisë dhe sa është e rëndësishme që me u prevenue kanceri tek gratë. Asnjëherë privatisht vetëm unë dhe ai këtë ta them me përgjegjësi të plotë nuk jemi takuar”, thotë Vitia.

Kreu i dikasterit të shëndetësisë, ka deklaruar se asnjëherë privatësisht s’është takuar Vitia me Arsenijeviçin, ndonëse në video shihen vetëm këta të dy.

“Aty kanë qenë së paku edhe dy veta të tjerë ku kemi qenë afër mamografit mobil dhe jam ulë në kafe aty dhe ka ardhur është ulur me mua dhe kemi biseduar këto tema që i thashë”.

Me bindje të plotë Vitia thotë se ka qenë edhe dikush tjetër aty në tavolinë.

“Për besë është e pamundshme eventualisht kur ka shkuar dikush ta bëjë pagesën ose diçka, jam i sigurt, jam qind për qind se aty kam qenë me shefin e kabinetit dhe ka qenë edhe një person tjetër tash mos gabofsha dikush nga komuna e Mitrovicës së Veriut”.

Arsenijeviç thotë se kjo ka qenë takim vetëm mes Vitisë dhe atij.

Vitia tha se më herët se kishte njohur Arsenijeviçin, por që nga ai u tha se me ministrin e Shëndetësisë së Kosovës njihet shumë më herët.

“Jemi ulur të pimë një kafe private, ka kërkuar të ulemi pasi njihemi më herët, tema e diskutimit nuk ka qenë as shëndetësia, e asgjë, thjeshtë ka pas dëshirë të pimë kafe. Unë kam qenë mikpritës i mirë, vetëm kemi pirë kafe”.

Duke shtuar se, “ministrin Vitia e konsideroj të vetmin normal në Qeveri, kështu që biseda ka qenë e karakterit privat kemi folur për çështje normale”.

Arsenijeviçi ishte arrestuar në fillim të muajit shtator për prishje të rendit dhe qetësisë publike.

Ai kishte protestuar kundër vizitës së kryeministrit Kurti në Veri duke fishkëlluar.

Gjatë kësaj kohe, Kurti po qëndronte në një restorant në fillim të sheshit në Mitrovicën e Veriut, i shoqëruar nga ministrat Xhelal Sveçla e Elbert Krasniqi.