Varane afër kalimit tek United, por jo për para – thotë gazetari i Goal për Albanian Post

Real Madrid-i po kalon një moment të vështirë. Largime të shumta, asnjë blerje, skandali i përgjimeve me presidentin Perez.

Të mbledhura së bashku, këto gjëra kanë shkaktuar një kaos tek Los Blancos, për të cilat, duket se nuk ka përgjigje.

Kështu thotë gazetari spanjoll i GOAL, Mario Cortegana, për Albanian Post.

Edhe pse shumë i afërt me klubin madrilen, Cortegana thotë që nga klubi, “qasja me mediat është bërë e pamundur”.

Ai ka shpjeguar edhe situatën e Raphael Varane, që dëshiron të largohet nga klubi madrilen pas një dekade në “Santiago Bernabeu”.

Pas Sergio Ramos, edhe Varane po kërkon që të largohet nga dera e pasme për një aventurë tjetër.

“Paratë nuk janë synimi i Varane”, tregon Cortegana. “Ai e ka bërë mendjen një, dhe asgjë nuk do ta ndryshojë këtë tani”.

“Ai e do klubin, e do ambientin, e do qytetin, por është i ngopur me të gjitha. Përkundër dashurisë për të gjithë, atë e tërheq shumë një transferim jashtë Spanjës, përkatësisht, në Angli”, shprehet Mario.

Për këtë, thotë Cortegana, janë në dijeni edhe zyrtarët e skuadrës, të cilët nuk do ta pengojnë largimin e francezit.

“Real-i shpreson të përfitojë 60 milionë euro nga transferimi i Varane-s, por ata do të jenë kënaqur edhe me 50 milionë”, tha ai.

Interesim për Varane kanë shfaqur shumë skuadra, por bisedimet me të dhe agjentët e tij i ka filuar vetëm një.

“Manchester United, futbollisti dhe agjentët e tij”, tregon Cortegana, “janë në bisedime për të arritur marrëveshje”.

“Bisedimet po shkojnë shumë mirë, marrëveshja pritet të finalizohet brenda javës së ardhshme”.

Djajtë e Kuq do të ofrojnë 50 milionë euro për shërbimet e mbrojtësit francez, shifër kjo që Real Madrid-i “nuk do ta kontestojë”.

Në fund, i pyetur mbi synimet e Real Madrid-it këtë verë në merkato, Cortegana tha se ato janë “Mbappe ose Haaland” dhe se “nëse nuk arrihet njëri nga të dy, nuk do të ketë asnjë ndryshim”.

Çështja Varane pritet të mbyllet në ditët e ardhshme, kurse ajo Mbappe(Haaland), nuk do të ketë përgjigje deri në fund të gushtit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.