Partia Socialdemokrate (PSD), ka vlerësuar se premtimi që ka dhënë ministrja e Punëve të Jashtme dhe Diasporës, Donika Gërvalla, për një statut që i ngjanë atij të Fondacionit Friedrich Ebert (FES) është “premtim për autonomi”.

I njëjti draft sipas PSD-së ishte refuzuar më 30 janar.

“Premtimi për një statut që i ngjanë atij të FES, është premtim për autonomi. Ky draft ishte refuzuar nga VV me 30 janar 2023. Tutje, kjo letër e nxjerr Asociacionin nga Pakoja e Marrëveshjes Bazike”, thuhet në komunikatën për media nga PSD-ja.

Kjo parti konsideron se kjo marrëdhënie tregon për raportet që krijon kryeministri Albin Kurti.

“Aq shumë ishte trumbetuar kjo gjë në publik si një pikë që s’kalohet, për t’u kaluar si një lëvizje e vogël taktike. Kjo tregon për llojet e marrëdhënieve që kultivon Kurti. Me këdo, qoftë qytetarë ose ndërkombëtar, Kurtit kurrë nuk i besohet. Fjala është taktikë lufte. Kështu, e vetmja marrëdhënie me të është ajo instrumentale. Kjo në fakt nuk është marrëdhënie, është mohim i tjetrit”.

Zëvendësministri për Punë të Jashtme, Kreshnik Ahmeti, kishte konfirmuar se Kosova ka mbetur jashtë agjendës së takimit të radhës së Këshillit të Ministrave të Këshillit të Evropës, ku do të shqyrtohej anëtarësimi apo jo i Kosovës në këtë organizatë ndërkombëtare.

Ndërkaq Gjermania dhe Franca kanë kërkuar që Kosova të bëjë një hap substancial në raport me Asociacionin – të paktën dërgimin e draft-statutit të këtij mekanizmi në Kushtetuese për shqyrtim –  kur në pyetje është anëtarësimi i Kosovës në Këshillin e Evropës.

Ndërsa kryeministri i Kosovës, Albin Kurti, të mërkurën në mbledhjen e radhës së Qeverisë së Kosovës e kishte quajtur “absurde” kërkesën e Gjermanisë dhe Francës që draft-statuti i Asocaicionit të dërgohet në Gjykatën Kushtetuese para anëtarësimit në KiE.

Por, më 15 maj, Qeveria e Kosovës iu drejtua me një letër Këshillit të Evropës, duke e njoftuar se Kosova po përgatit një draft-statut për themelimin një mekanizmi për vetëmenaxhim, koordinim dhe bashkëpunim të Komunave me Shumicë Serbe në Kosovë.

Ky draft, do të dërgohet për interpretim në Gjykatën Kushtetuese deri në fund të muajit maj.