Julian Nagelsmann ka dhënë një deklaratë që me shumë mundësi nuk do t’iu pëlqej aspak tifozëve të Bayern Munich.
Para ndeshjes me Mainz që zhvillohet të shtunën, Julian Nagelsmann si zakonisht u shfaq para mediave.
Ai foli për kundërshtarët si gjithmonë, vështirësinë që paraqet takimi, pritshmëritë për ndeshjen dhe futbollistët që do të mungojnë.
Por, përveç këtyre, në listën e pyetjeve të gazetarëve u paraqit një pikëpyetje interesante.
Njëri nga gazetarët e pranishëm e pyeti trajnerin gjerman se pse i tha ‘jo’ Real Madrid-it në vitin 2018.
Nagelsmann ishte favoriti për të zëvendësuar Zidane-n për një kohë të gjatë, por kjo nuk ndodhi, vetëm për shkak se Nagelsmann refuzoi ofertën e madrilenëve.
Dhe përgjigja e tij për këtë pyetje, ishte e qartë.
“Sepse ishte një hap shumë i madh”, tha ai.
“Isha te Hoffenheim dhe po kërkoja një hap më të madh, jo hapin më të madh”.
“Atje është krejtësisht një tjetër dimension”, u shpreh Nagelsmann.
Trajneri gjerman i la derën hapur madrilenëve, por duke thënë që është shumë i lumtur te Bayern-i dhe te periudha që po kalon me klubin.
Nagelsmann ka kontratë pesë vjeçare me bavarezët, dhe me mënyrën se si ka nisur aventura – pritet që ajo të përmbushet.
Se a do të bëhet ndonjëherë realitet lidhja Real Madrid – Nagelsmann, mbetet për t’u parë, por një është e sigurt, që të dy palët e respektojnë në maksimum njëra-tjetrën.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
