Nëntë futbollistë shqiptarë do të marrin pjesë në “Euro 2020”

Kampionati Evropian “Euro 2020” nuk do të përfaqësohet nga Shqipëria apo Kosova, megjithatë kësaj ngjarjeje të madhe futbollistike nuk mund t’i mungojnë shqiptarët.

Nëntë futbollistë me prejardhje shqiptare, do të marrin pjesë në këtë Kampionat Evropian, i cili do të zhvillohet në 11 qytete të ndryshme evropiane.

Si zakonisht, tek ekipi kombëtar i Zvicrës është e pamundur që mos të ketë futbollistë shqiptarë.

Granit Xhaka, Xherdan Shaqiri dhe Admir Mehmedi janë pjesë e kombëtares zvicerane që do të luajnë në “Euro 2020”.

Kapiteni Xhaka dhe futbollisti i Liverpool-it, Shaqiri, janë shtyllat kryesore në formacionin e trajnerit Vladimir Petkovic, vlen të kujtojmë dy golat që kosovarët shënuan ndaj Serbisë në Kampionatin Botëror të vitit 2018.

Zvicra bën pjesë në Grupin A, së bashku me Italinë, Turqinë dhe Uellsin, derisa ndeshjen e parë do ta luajnë kundër Uellsit më 12 qershor.

Futbollistë shqiptarë do të ketë edhe në ekipin e Maqedonisë së Veriut, e cila do të marrë pjesë për herë të parë në një Kampionat Evropian.

Gjashtë futbollistë me prejardhje shqiptare do të përfaqësojnë ngjyrat e Maqedonisë së Veriut në “Euro 2020”.

Enis Bardhi, Ezgjan Alioski, Arijan Ademi, Ferhan Hasani, Egzon Bejtullai dhe Visar Musliu janë shqiptarët e ftuar nga trajneri Igor Angelovski.

Maqedonia e Veriut bënë pjesë në Grupin C, së bashku me Holandën, Austrinë dhe Ukrainën, derisa ndeshjen debutuese, maqedonasit do ta zhvillojnë përballë Austrisë më 13 qershor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.