Zëvendësministrja e Arsimit, Shkencës, Teknologjisë dhe Inovacionit, Edona Maloku-Bërdyna është shprehur se janë duke vazhduar të përballen me të njëjtat problematike, pasi kontratat për shujtat derivon nga qeveritë e kaluara.
“Sa u përket shujtave kjo është një çështje që po vazhdon të jetë problematike, është pjesë e një kontrate që derivon nga nënshkrimi i kontratës nga qeveritë e kaluara, gjithsesi është diçka që ne duhet të ballafaqohemi, me aq sa unë kam informata deri më tani nuk është se kemi ndonjë kërkesë specifike nga ndonjë komunë”, deklaroi ajo.
Bërdyna, këto i bëri të ditur përmes një konferencë për media, ndërsa ka thënë se deri më tani nuk kanë ndonjë kërkesë specifike nga komunat.
“Mirëpo në momentin që kjo bëhet natyrisht që do të shohim se cilat janë mundësitë ligjore që këto të adresohen brenda kompetencave që MASHT ka. Deri atëherë vazhdon të jetë një kontratë problematike dhe sigurisht kërkon adresim pak më të gjerë”, ka thënë ajo.
Ndërsa, shtoi se 772 shkolla po punojnë me skenarin e rikthimit, nga 775 institucione arsimore sa janë gjithsej.
“Nga 775 institucione edukative dhe arsimore janë gjithsej 772 që po punojnë me skenarin e rikthimit ndërkaq sipas skenarit A është vetëm një shkollë, sipas skenarit B nuk ka asnjë shkollë, ndërsa sipas skenarit C janë gjithsej dy shkolla”.
“Sa i përket numrit të personave të infektuar me Covid-19 në institucionet edukativo arsimore janë gjithsej 72 mësimdhënës që janë raportuar si persona aktiv me Covid-19, janë 101 pjesëtarë të tjerë të personelit që janë raportuar si raste aktive me Covid-19, ndërsa në grupin e nxënësve ka gjithsej 248 raste aktive me Covid-19”.
Ajo po ashtu potencoi se janë duke u përgatitur për testin PISA.
“Kosova do të marrë pjesë në testin PISA, janë bërë disa përgatitje, kemi përfunduar fazën e përzgjedhjes së shkollave dhe jemi faktikisht në fazën e kontaktimit të këtyre shkollave ku do të marrim pastaj edhe listën e nxënësve prej të cilave do t’i përzgjedhim nxënësit. Përtej kësaj natyrisht se ne tani angazhohemi në pjesën e pilotimit. Deri më sot kemi përzgjedhur 237 shkolla dhe prej tyre presim që të përzgjidhen rreth shtatë mijë nxënës”, ka thënë ajo.
Ndryshe, për herë të tretë, Ministria e Arsimit ka vendosur që Kosova t’i nënshtrohet testit ndërkombëtar për nxënësit të njohur si PISA.
Kështu kishte konfirmuar zëvendësministri i Arsimit, Shkencës, Teknologjisë dhe Inovacionit, Dukagjin Pupovci për Albanian Post.
“Kosova do të merr pjesë në PISA 2022 dhe për këtë janë bërë të gjitha përgatitjet”, deklaroi Pupovci për AP.
Nga vendet fqinje Kosova duket se ka ngecur mbrapa pasi këto të fundit kanë përformuar më mirë nga rezultatet e testit PISA të vitit 2018.
E para nga shtetet e Ballkanit Perëndimor, pjesëmarrëse në këtë test, është radhitur Serbia, e pasuar nga Mali i Zi, Shqipëria dhe Maqedonia e Veriut.
Edhe në vitin 2015, Kosova është renditur më poshtë se Shqipëria, Mali i Zi dhe Maqedonia e Veriut, ndërsa Serbia nuk ka marrë pjesë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
