Lulzim Hetemi, kryetari i ri i Leposaviqit: Do vendosim ligjin në Veri

Një ditë pas zgjedhjeve të jashtëzakonshme për Kryetar Komune në katër komunat veriore, Lulzim Hetemi, i cili e fitoi garën në Leposaviç, ka thënë për Albanian Post se “po ndihem shumë mirë”.

Për dallim nga dy kryetarët tjerë, Izmir Zeqiri i cili fitoi në Zubin Potok dhe Ilir Peci në Zveçan nga Partia Demokratike e Kosovës, të cilët kishin dyshime se mund të bëjnë progres për shkak të bisedimeve në Bruksel dhe presionit të strukturave paralele, Lulzim Hetemi i Vetëvendosjes, i cili do të udhëheqë me komunën e Leposaviqit është i bindur se do të bëjë punë të mirë. Por, me mbështetjen e kryeministrit të Kosovës, Albin Kurti.

“Ma merr mendja se në bashkëpunim me qeveri e me kryeministrin do të bëjmë punë të mirë. Ai i ka planet e veta, prandaj kanë mbajtur zgjedhje dhe kemi kandiduar ne. Besoj që do të bëhet mirë e do të ecim përpara”, ka thënë Lulzim Hetemi, Kryetari i ri i Leposaviqit, në një prononcim për Albanian Post.

“Planet e qeverisë janë të vihet rendi e ligji në çdo pjesë të Kosovës e gjithashtu edhe në komunën tonë, në Leposaviq”, thekson Hetemi.

Duke i njohur nga afër banorët e komunës me të cilën do të udhëheqë, Hetemi thotë se do të ketë bashkëpunim, nëse nuk vazhdon presioni i shtetit serb përmes strukturave paralele.

“Ka qytetarë që duan të bashkëpunojnë. Qytetarët e thjeshtë janë për bashkëpunim por, kanë kërcënime. Ma merr mendja që me qeverinë e Albin Kurtit do t’ia dalim të vëmë rend e ligj në këto komuna e edhe në Leposaviq”, thotë ai.

Hetemi tregon se në Leposaviq ka siguri të mjaftueshme për të funksionuar, por duhet të bashkëpunoj më shumë me qytetarë që të arrijë integrimin e plotë të tyre.

“Siguria është, tash nuk mund të qahemi, sepse siguri ka në Leposaviq e deri në kufi. Duhet të bisedojmë me qytetarë që t’i integrojmë më shumë, e kam fjalën për qytetarët e komunitetit serb. Ky është prioriteti ynë, pastaj vinë të tjerat”, tregon Hetemi.

Ai shprehet i bindur se me të në krye të Leposaviqit, qytetarët do ta ndjejnë dorën e shtetit.

“Keqpërdorimet e komunës, çdo gjë që është investuar atje, është investuar nga njerëz e banda të caktuara. I kanë dërguar njerëzit e tyre nëpër poste e pozita të caktuara. Qytetari i thjeshtë nuk e ka ndjerë kurrë dorën e shtetit e Qeverisë së Kosovës. Tash do të mundohemi ta bëjmë këtë gjë,” thotë Hetemi për Albanian Post.

“Ne jemi takuar para zgjedhjeve dy herë me kryeministrin Kurti”, tregon Hetemi, “ai është i bindur se do të vëmë rend e ligj dhe të ketë investime në bujqësi, infrastrukturë e te të gjithë sektorët si për serbët ashtu edhe për shqiptarët”, premton kryetari i ri i Leposaviqit.

Hetemi beson se edhe qytetarët serb do ta mbështesin, ani pse nuk mori votën e tyre.

“Ma merr mendja që edhe serbët do të më përkrahin të kryej punën time si kryetar”.

Por, për këtë ai thotë se fillimisht duhet “të shkoj e të bisedoj me ta, ti takoj qytetarët e thjeshtë sepse me të fuqishmit nuk kam çfarë takohem, me Jabllanoviç-a nuk takohem”, shprehet Hetemi.

Dhe pavarësisht problemeve ai tregon se nuk e ka ndërmend të ndalet.

“Ne nuk duhet të dorëzohemi, të ecim përpara, të provojmë të gjitha opsionet e të arrijmë zgjidhje”, përfundon Heteni, për Albanian Post.

Lulzim Hetimi i LVV-së doli i pari në garën për kryetar në komunën e Leposaviqit. Ky i numëroi 100 vota apo 73.5 për qind, ndërsa Albulena Behluli-Hetemi e PDK-së pati 34 vota apo 25 për qind. Ndërsa Aleksandër Jabllanoviç, edhe pse u tërhoq nga gara, mori dy vota.

Erden Atiq do jetë kryetar i Mitrovicës së Veriut, pasi ka marrë 519 vota apo 66.5 për qind, derisa pas tij është renditur ai i Partisë Demokratike të Kosovës, Taulant Kelmendi, me186 vota apo 23.8 për qind dhe Betim Osmani nga Iniciativa Qytetare Mitrovica me 75 vota apo 9.6 për qind.

Zveçani e Zubin Potoku janë dy komunat ku Partia Demokratike e Kosovës do ta ketë udhëheqjen.

Izmir Zeqiri, do të jetë kryetar i Zubin Potokut, pasi që arriti të dalë më i votuari me 196 vota apo 52.1 për qind, kurse Flatron Hasani nga LV-ja pati 180 vota apo 47.9 për qind.

Sipas KQZ-së, PDK-ja do ta ketë kryetarin e komunës edhe në Zveçan.

Ilir Peci mori 114 vota apo 60 për qind, ndërsa Fetah Peci i VV-së mori 71 vota apo 37.4 për qind. Sllagjana Pantoviç si kandidate e pavarur mori pesë vota apo 2.6 për qind.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.