Sport

Lorik Cana, idhull në fushë dhe jashtë saj


Lorik Cana, kapiteni legjendar i Kombëtares shqiptare, futbollisti me më shumë paraqitje me fanellën kuqezi, udhëheqësi në kampionatin e parë me rëndësi ku Shqipëria merrte pjesë, EURO 2016, duket se edhe pas futbollit ka po aq sukses sa brenda fushës së blertë.

Ish-numri 5 i Kombëtarës, lideri në çdo ndeshje, heroi i natës së Beogradit, përfaqësuesi ynë në Francë, Angli, Itali dhe Turqi, një legjendë e gjallë, me plot kuptimin e fjalës.

Lorik Cana, në karrierën e tij futbollistike, për ta përmbledhur me fjalë pak, e duke thënë shumë, ndërtoi një emër që respektohet kudo që ka luajtur, e ndërtoi një figurë që adhurohet nga çdo shqiptar.

Ai ishte futbollist i skuadrave të mëdha, si Marseille, Lazio, Paris Saint-Germain, luajti në Angli për Sunderland, kaloi kohë te Lazio në Itali, te Galatasaray në Turqi dhe perden e mbylli aty ku filloi gjithçka, në Francë, me skuadrën modeste të Nantes.

Pasi mbylli karrierën e tij në fushat e futbollit, Cana vazhdoi aktivitetin e tij jashtë saj.

Loriku është ambasador i “Grassroots” për futbollin e fëmijëve në Shqipëri. Në këtë pozitë Cana u emërua në vitin 2017 nga Federata Shqiptare e Futbollit.

Përveç futbollist, në një intervistë të hershme, ish-kapiteni i Kombëtares tregonte edhe preferenca të tjera të tij.

Cana shprehu që një ndër gjërat që e tërheqin më së shumti dhe ka interes të madh për të, është arkeologjik, pasi ka përfunduar fakultetin e historisë.

Gjithashtu, ish-kapitenin e shohim edhe si figurë publike, duke qenë se është fytyra e shumë reklamave të ndryshme sportive e më gjerë.

Loriku po ashtu angazhohet edhe si analist futbolli në netët Champions në “Tring Sport”.

Shumica e futbollistëve pas eksperiencës së tyre në futboll, ose në çfarëdo sporti tjetër, “zhduken” nga ekranet televizive dhe nuk shihen më.

Në mesin e atyre pak sportistëve që e shfrytëzojnë famën që kanë akumuluar gjatë karrierës së tyre për të patur një superkarrierë edhe pas pensionimit nga sporti, është Lorik Cana.

Ish-kapiteni është ambasador i Kombeve të Bashkuara kundër varfërisë.

Në vitin 2015, Cana u emërua Ambasador i nderit në Kosovë.

Një idhull për shembullin që dha në fushë dhe jashtë saj, Cana gëzon edhe një jetë të lumtur familjare.

Që prej afër shtatë viteve qëzon një martesë të lumtur me italianen, Monica Ercoli, me të cilën ka një djalë, quajtur Boiken, dhe një vajzë, quajtur Enkeleida.

Për momentin, Cana jeton në Tiranë bashkë me familjen e tij.

Nga një kapiten futbolli, i shndërruar në kapiten marketingu.

Loriku është shembull ideal dhe pikënisje për shumë sportistë të rinj në Shqipëri, Kosovë, Maqedoni e shumë vende të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore