Kush është Bajram Begaj, Presidenti i ardhshëm i Shqipërisë?

Shefi i Shtabit të Përgjithshëm të Forcave të Armatosura, Gjeneral Major Bajram Begaj u zgjodh si kandidat nga kryesia e Partisë Socialiste për kreun e shtetit në Shqipëri.

Begaj u lind më datë 20 mars të vitit 1967, në Rrogozhinë. Ai do të përfundonte studimet në Fakultetin e Mjekësisë në Degën Mjekësi e Përgjithshme në vitin 1989 dhe është titulluar oficer aktiv në specialitetin “Mjekësi” në vitin 1998.

Gjeneral Major Begaj ka përfunduar “Doktoraturën në Fushën e Mjekësisë”, në Shqipëri, si dhe mban titullin “Profesor i Asociuar” në Mjekësi.

Gjatë karrierës 31-vjeçare ushtarake ka kryer Kursin e Lartë për Sigurinë dhe Mbrojtjen; Shkollën e thelluar pasuniversitare të mjekësisë, Specializimin Pasuniversitar në profilin Gastrohepatologji, Kursin e menaxhimit spitalor dhe Kursin e lidershipit mjekësor strategjik, në Shtetet e Bashkuara të Amerikës, si dhe Kursin epecializimit në fushën e mjekësisë dhe Kursin e Shëndetësisë, në Greqi.

Sakaq, Gjeneral Major Begaj ka drejtuar stërvitjen ushtarake “Defender Europe 2021” dhe është një nga emrat, i cili gëzon konsideratë të lartë nga SHBA-të.

Ndërkohë që, në Forcat e Armatosura ka mbajtur një sërë detyrash, mes të cilave Komandant i Komandës së Doktrinës dhe Stërvitjes, Shef i Njësisë Mjekësore Ushtarake dhe Zëvendësdrejtor Ushtarak i SUT, Drejtor i Spitalit Ushtarak, Drejtor i Inspektoriatit Shëndetësor dhe Kryeinspektor dhe Këshilltar i Inspektoriatit Shëndetësor në Shtabin e Përgjithshëm Ushtarak Qendror Universitar.

Ai është i martuar dhe ka dy fëmijë.

Si u arrit te ky emër?

Pas mbledhjes së PS-së, e cila zgjati për dy orë dhe u zhvillua pa praninë e telefonave, kryeministri i Shqipërisë, njëkohësisht edhet kryetar i selisë rozë, Edi Rama, bëri publik emrin e kandidatit zyrtar të mazhorancës për President të Republikës së Shqipërisë.

Për kryeministrin, Begaj është “shëmbëlltyra e atij normaliteti, e asaj qytetarie, e sensit të shërbimit ndaj vendit dhe njerëzve të këtij vendi, për të cilin ajo zyrë ka një nevojë urgjente”.

Begaj do të jetë i treti president në Republikën e Shqipërisë që vjen nga bota ushtarake.

Rama sqaroi se, në fillim, janë përjashtuar emrat e ardhur nga grupi parlamentar dhe ato të ardhur nga jeta politike.

“Ne duhet t’u japin shqiptarëve një president që nuk ka karrierë në PS”, tha Rama.

Të shtunën e 4 qershorit ky emër pritet të depozitohet në Kryesinë e Kuvendit – pasi të jetë firmosur nga të paktën 20 deputetë – ku disa orë më vonë do të mbahet edhe votimi.

Në mbledhje u diskutua mbi një listë prej 26 kandidaturash të propozuara nga ligjvënësit socialistë.

Detyrën e kreut të shtetit e mban Ilir Meta.

Këtij të fundit i mbaron mandati më 24 korrik, 2022.

Tanimë fjalën e ka votimi në Kuvendin e Shqipërisë, të shtunën ora 18:00, në një seancë të posaçme plenare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.