Kurti si opozitar: Kur të qeverisim do lirohen buka… ASK: Çmimet u rritën për 2.2 për qind krahasuar me një vit më parë

Albin Kurti, në një paraqitje televizive në Kohavizion në vitin 2014, si lider i Lëvizjes Vetëvendosje, kishte shpalosur detajet e programit qeverisës të LVV-së, ku kishte thënë se me ardhjen e partisë së tij në qeverisje, çmimet e produkteve elementare ushqimore do të ulen konsiderueshëm, ndërsa luksi do të shtrenjtohej.

“TVSH bëhet zero për gjërat elementare ushqimore. Buka me Lëvizjen Vetëvendosje nga 36 cent, që është mesatarja për çmimet e muajit shkurt për vitin 2014, bëhet 31 cent. Sheqeri nga 72 cent kilogrami bëhet 62 cent. Qumështi nga 91 cent mesatarisht bëhet në 78 cent. Vaji nga 1 euro e 23 cent, bëhet në 1 euro 6 cent”, deklaronte Kurti.

Por, tani kur Kurti është gati në përfundim të mandatit të parë si kryeministër, sipas Agjencisë së Statistikave të Kosovës, çmimet e konsumit në muajin korrik të këtij vitit janë rritur për 2.2 për qind krahasuar me korrikun e vitit të kaluar, ndërsa për 0.3 për qind krahasuar me qershorin e këtij viti.

“Bileta të fluturimeve (22,0%); kafe, çaj dhe kakao (7,7%); peshq (7,7%); pije alkoolike (7,2%); pemë (6,3%); lëndë djegëse të ngurta, dru zjarri, pelet etj. (6,0%) qelqurina, takëme dhe mjete të kuzhinës (5,9%) mallra dhe shërbime për mirëmbajtjen e zakonshme të ekonomisë shtëpiake (5,6%) sheqer, reçel, mjaltë, çokollatë dhe ëmbëlsira (5,6%) veshje (4,9%); kujdes personal (4,3%) ujë mineral, pije joalkoolike, lëngje nga pemët dhe perimet (3,7%) gjëra dhe pajisje të tjera rekreative”, thuhet në raport.

“Kopshte dhe manare (3,6%), bukë dhe drithëra (3,1%), duhan (2,7%), karburante dhe lubrifikantë për pajisjet e transportit personal (2,1%),  prodhime ushqimore (2,1%), shërbime hoteliere (1,9%); mirëmbajtje dhe rregullim i vendbanimit (1,8%), pajisje shtëpiake (1,5%), mish (1,4%); energji elektrike (0,9%) dhe qumësht, djathë dhe vezë (0,3%), me një ndikim të përbashkët të këtyre nëngrupeve prej 2,4 për qind në IHÇK”.

Se do ketë rritje të çmimeve parashikohej edhe në raportin “Rrreziqet Globale 2023”, ku thuhej se Kosova parashikohet të goditet nga varfëria, inflacioni, dëmet mjedisore dhe përplasjet gjeoekonomike.

Aty theksohej se Kosova rrezikohej më së shumti nga dëmi mjedisor i shkaktuar nga njeriu, inflacioni i shpejtë, kriza e kostos së jetesës, konfrontimi gjeoekonomik, dështimi i masave të sigurisë kibernetike dhe pabarazia dixhitale.

Ndërkaq gjatë vitit të kaluar, Ligji për masat e përkohshme të produkteve themelore në raste të veçanta të destabilizimit në treg është shpallur i pavlefshëm nga Gjykata Kushtetuese e Kosovës.

Tri partitë më të mëdha opozitare në Kuvendin e Kosovë patën kundërshtuar ligjin e hartuar nga Qeveria e Kosovës për vendosjen e çmimeve tavan në produktet themelore.

Qeveria kishte deklaruar se ligji ishte hartuar për shkak të “rritjes së paarsyeshme të çmimeve bazë dhe ankesave të shumta të qytetarëve, lidhur me rritjen e menjëhershme të çmimeve te të gjitha produktet bazë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.