Kurti: Serbia synon ta kthejë Urën e Ibrit në kufi, por s’do të realizohet

Kryeministri i Kosovës, Albin Kurti, ka deklaruar se Serbia dëshiron ta mbajë të mbyllur Urën e Ibrit, sepse dëshiron që ëndrra për ndarjen e Kosovës të mbetet e gjallë.

Kurti në një intervistë për agjencinë e lajmeve Reuters, ka thënë se synimet e Serbisë janë të njohura, por që s’do të realizohen.

“Serbia dëshiron ta mbajë të mbyllur urën në Mitrovicë sepse dëshiron ta mbajë të gjallë ëndrrën për ndarjen e Kosovës. Ajo dëshiron ta shndërrojë urën mbi Ibër në një kufi të ri. Kjo nuk do të ndodhë”, tha ai, teksa shtoi se “ne duhet ta hapim urën dhe ta bëjmë Kosovën normale”.

Sipas tij, Perëndimi është duke e përkëdhelur Serbinë për shkak të frikës dhe shqetësimeve për destabilizim, duke theksuar se ajo nuk po “shpaguhet” dhe sipas tij Kosova po “paguan” për këtë.

Teksa theksoi se është koha që dikush të kërkoj që kjo të ndalet.

“Mendoj se përkëdhelja e Serbisë nga Perëndimi gjatë dy vjetëve e gjysmë prej se ka nisur agresioni rus në Ukrainë nuk po shpaguhet, prandaj dikush duhet të thotë mjaft”.

Sipas Kurtit, “Perëndimi duke qenë shumë i kujdesshëm me Serbinë, po bën që edhe Kosova të paguajë për këtë”, duke pohuar se “kjo nuk është e drejtë”.

Ai ka përmendur edhe arsyet përse bashkimi ndërkombëtar po tregohet i kujdesshëm me Serbinë.

“Lidhjet e fuqishme të Serbisë me Federatën Ruse dhe lidhjet e thella historike, ekonomike dhe kulturore mes tyre, po e bëjnë Perëndimit të jetë shumë i kujdesshëm me Serbinë”, tha Kurti.

“Serbia ka gjetur partnerë edhe në Perëndim për shkak të frikës dhe shqetësimeve që disa diplomatë i kanë se mund të ndodhë destabilizimi përsëri. Para luftës në Ukrainës kam parë disa diplomatë perëndimorë shumë të relaksuar, tani të njëjtit janë shumë të frikësuar. Mendoj se ata e kanë pasur gabim atëherë dhe e kanë gabim tani”.

I pakënaqur është shprehur kryeministri edhe me mënyrën e kritikave që vinë nga BE-ja.

“Brukseli duhet ta luajë rolin e gjyqtarit që i bie pipit kurdo herë që ka shkelje të Marrëveshjes”, tha Kurti, teksa iu referuar Marrëveshjes Bazë që Kosova dhe Serbia e arritën nën ndërmjetësimin e BE-së në fillim të vitit 2023 për normalizimin e marrëdhënieve.

Ai ka thënë se deri tani Brukseli s’ka reaguar kur Beogradi e ka shkelur marrëveshjen.

“Ne duam që Brukseli t’i bëjë trysni Serbinë ta respektojë marrëveshjen dhe të angazhohet me vullnet të mirë dhe në mënyrë konstruktive në zbatimin e plotë të saj”, tha Kurti.

Qeveria e Kosovës në mes të korrikut njoftoi se synon të hapë urën kryesore mbi lumin Ibër në Mitrovicë.

Megjithatë, vendet e QUINT-it deklaruan se nuk e mbështesin hapjen për trafik të Urës në këtë moment.

Ndërkohë Misioni i NATO-s në Kosovë, KFOR-i, deklaroi se çdo vendim për hapjen e urës kryesore mbi lumin Ibër duhet të merret në kuadër të dialogut mes Kosovës dhe Serbisë, që ndërmjetësohet nga Bashkimi Evropian.

Pas këtyre kërkesave, kryeministri i Kosovës, Albin Kurti deklaroi se konsultimet rreth hapjes së urës mbi lumin Ibër do të vazhdojnë, ndërsa ka shtuar hapja e urës kryesore në Mitrovicë nuk është kundër partnerëve të Kosovës.

Ministria e Mjedisit, Planifikimit Hapësinor dhe Infrastrukturës (MMPHI) kishte publikuar një raport fillestar për inspektimet teknike të kryera ditët e fundit në urën e Ibrit, duke thënë se ajo është e “qëndrueshme dhe funksionale” dhe se mund të përdoret pa asnjë kufizim ngarkese.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.