Kryeministri i Kosovës, Albin Kurti, këtë të premte ka takuar Ndihmës Sekretarin për Çështjet Evropiane dhe Euroaziatike të Departamentit të Shtetit Amerikan, James O’Brien dhe të deleguarin e Bashkimit Evropian për dialogun, Miroslav Lajçak.

Nëpërmjet një komunikate për media, bëhet e ditur se Kurti gjatë takimit ka potencuar se Kosova kërkon që Marrëveshja e Brukselit/Ohrit të zbatohet në plotni.

“Kurti ritheksoi përkushtimin dhe angazhimin konstruktiv në procesin e normalizimit ndërmjet Kosovës dhe Serbisë sipas parimeve të Marrëveshjes Bazike dhe Aneksin e saj, që duhet të zbatohet e plotë”, thuhet në komunikatë.

Gjatë takimi, siç njofton komunikata, Kurti – O’Brien e Lajçak kanë diskutuar edhe për zhvillimet e fundit në vend dhe për Procesin e Berlinit.

“Kryeministri ndër të tjera theksoi së Qeveria e Republikës së Kosovës është e angazhuar maksimalisht edhe në vazhdimësi në ofrimin e shërbimeve cilësore për qytetarët e saj pa dallim dhe për krijimin e një ambienti të sigurt për të gjithë në të cilin respektohen të drejtat e qytetarëve dhe ligjit i Republikës”.

Kurti gjatë takimi ka nënvizuar edhe përkushtimin e tij për bashkëpunim rajonal mbi parimet e përfaqësimit dhe pjesëmarrjes së barabartë në mes vendeve të Ballkanit Perëndimor.