Koreja e Veriut dhe e Jugut rivendosin kontaket pas një viti

Koreja e Veriut dhe e Jugut kanë rivendosur një linjë telefonike të komunikimit që u ndërpre nga Pyongyang qershorin e kaluar.

Këto “sinjale” vijnë nga zyra presidenciale e Koresë së Jugut, e cila thekson se udhëheqësit e të dyja shteteve janë dakordësuar për të rindërtuar besimin dhe për t’i përmirësuar marrëdhëniet.

Në deklaratë cilësohet se udhëheqësit kanë shkëmbyer disa letra personale që nga muaji prill.

Ndërtimi i situatës

Koreja e Veriut ndërpreu linjën telefonike në qershor të vitit 2020. Kjo, ndërsa marrëdhëniet u acaruan pas një samiti të dështuar midis dy vendeve.

Pas kësaj, Koreja e Veriut ndërmori një akt duke shpërthyer një zyrë kufitare, që ishte ndërtuar pikërisht për të përmirësuar komunikimet.

“Sipas marrëveshjes midis udhëheqësve të lartë, Veriu dhe Jugu morën një masë për të ri-operuar të gjitha linjat ndërlidhëse të komunikimit ndër-koreane nga ora 10:00 e 27 korrikut”, tha agjencia zyrtare e lajmeve KCNA e Koresë së Veriut.

Agjencia koreano-veriore shtoi se udhëheqësit ranë dakord të bëjnë një hap të madh në rikuperimin e besimit të ndërsjellë dhe promovimin e pajtimit.

Përfaqësues nga të dyja palët folën në telefon për tri minuta, sipas Ministrisë së Bashkimit të Koresë së Jugut. Ministria shtoi se një thirrje tjetër do të kryhej të martën pasdite dhe çdo ditë që nga ai moment.

“Ne jemi të lumtur të flasim përsëri pas më shumë se një viti. Shpresojmë që kjo të sjellë lajme të mira për të gjithë qytetarët koreanë”, tha përfaqësuesi i Jugut.

Përkeqësimi i marrëdhënieve

Lidhjet midis të dyja vendeve u përmirësuan në vitin 2018, kur presidenti i Koresë së Jugut, Moon Jae-in dhe udhëheqësi i Koresë së Veriut, Kim Jong-un u takuan tri herë.

Por, kjo u rrënua pas dështimit të samitit të dytë midis Kim dhe presidentit të atëhershëm të SHBA-ve, Donald Trump.

Tensionet më vonë u përkeqësuan, të nxitura nga grupe dezertuese në Jug, duke e dërguar propagandën përtej kufirit.

Kjo përfundimisht bëri që Koreja e Veriut t’i ndërpresë të gjitha lidhjet e komunikimit ushtarak dhe politik, duke përfshirë edhe linjën midis udhëheqësve të tyre.

Presidenti i Koresë së Jugut kishte bërë thirrje që linja e telefonit të rikthehet. Bisedimet mes tyre synojnë shpërbërjen e programeve bërthamore dhe raketore të Koresë së Veriut.

Të dyja Koretë mbeten teknikisht në luftë, sepse Lufta Koreane 1950-1953 përfundoi me një armëpushim dhe jo me një traktat paqeje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.