Jurgen Klopp ka thënë se ai është ende trajner i Liverpool-it “për shkak të së kaluarës” dhe jo formës aktuale të ekipit të tij.
Brendan Rodgers dhe Graham Potter u shkarkuan të dielën, që do të thotë se 12 menaxherë të Premier League janë shkarkuar këtë sezon, i cili është rekord.
Liverpool është në rrezik për përfundimin e tyre më të keq në ligë nën drejtimin e Klopp, skuadra e të cilit viziton Chelsea-n të martën, por pozicioni i tij ende nuk është vënë nën shqyrtim.
“Nëse do të ishte sezoni im i parë do të ishte pak më ndryshe”, tha gjermani.
“Unë jam i vetëdijshëm për faktin se jam ulur këtu për shkak të së kaluarës, jo për shkak të asaj që kemi bërë këtë sezon”.
Klopp, 55 vjeç, ka ndihmuar Liverpool-in të fitojë trofetë kryesorë të futbollit të klubit gjatë shtatë viteve e gjysmë në Anfield, duke e bërë atë trajnerin më jetëgjatë në Premier League momentalisht.
Reds kanë humbur tre ndeshjet e tyre të fundit në të gjitha garat dhe janë në pozitën e tetë në ligë, pozicionin që e përfunduan në 2015-16 – sezoni në të cilin Klopp mori drejtimin nga trajneri i mëparshëm Rodgers.
“Ne kemi pronarë të zgjuar, ata e dinë situatën”, shtoi ai.
“Nuk ka nevojë që unë të kem frikë, unë jam këtu për të ofruar, nuk jam këtu si hajmali apo për murale në muret e shtëpive.
“E di që jam ende këtu për shkak të asaj që ka ndodhur në vitet e fundit.
“Nuk më pëlqen fakti që më duhet të mbështetem shumë në këtë. A është e drejtë apo jo? Do të shohim në të ardhmen”.
Liverpool sfidoi Manchester City-n për titullin e Premier League në tre nga katër sezonet e mëparshme, duke fituar titullin e parë të klubit në 30 vjet në 2019-20.
Megjithatë, ata janë 30 pikë prapa liderit aktual Arsenal pas humbjes 4-1 të së shtunës ndaj City-t.
Me 11 ndeshje të mbetura, skuadra e Klopp është tetë pikë larg vendeve të kualifikimit në Champions League.
“Unë jam plotësisht i përfshirë, nuk ka dyshim për këtë, por ne duhet ta rregullojmë atë”, tha ai. “Ne nuk mund të vazhdojmë të luajmë siç bëjmë herë pas here. Kjo nuk lejohet.
“Jam shumë i zhgënjyer për ne, që bëjmë gjëra të tilla, por ndodhi. Tani duhet të gjejmë një rrugëdalje dhe kjo është ajo për të cilën po punojmë vazhdimisht”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
