Fillon sot faza play-off e Championship, nëpërmjet të cilës skuadrat sigurojnë vendin e fundit që dërgon në Premier League.
Këto katër vende sigurohen përmes sezonit të rregullt në Championship.
Skuadrat që përfundojnë nga vendi i tretë në të gjashtin ndeshen mes vete në gjysmëfinale, për të caktuar finalen e play-off.
Gjysmëfinalet janë ndeshje vajtje-ardhje, që skuadrat luajnë brenda dhe jashtë, kurse finalja luhet në mitikun “Wembley”, vetëm një ndeshje.
Vendi i tretë udhëton te i gjashti dhe i katërti udhëton te i pesti.
Në këtë tast, Brentford e vendit të tretë, ndeshjen e parë e zhvillon si mysafirë në “Vitality stadium” te Bournemouth-i i vendit të gjashtë.
Kurse, Swansea e vendit të katërt, udhëton në “Oakwell” si mysafirë të Barnsley-t.
Bournemouth – Brentford
Fillon sonte, më 17 maj, në orën 19:00.
Vendasit kërkojnë kthimin në ligën elitare angleze vetëm një vit pas rënies nga kategoria.
Kurse, bletët, siç njihen Brentford, kërkojnë pjesëmarrjen në Premier League për herë të parë në histori, ose në kategorinë e parë për herë të parë që nga sezoni 1946-47.
Plot 75 vite pa pjesëmarrje në ligën elitare të futbollit anglez, Brentford ka pasur një rritje të jashtëzakonshme viteve të fundit. Në sezonin 2008/09, ata militonin në kategorinë e katërt të futbollit anglez.
Ndeshjet në sezonin e rregullt këtë vit i ka fituar Brentford-i, duke fituar 2-1 si vendas dhe 0-1 në “Vitality”.
Bletët konsiderohen si favoritë absolut të këtij dueli.
Barnsley – Swansea
Kjo ndeshje zhvillohet po ashtu sonte, në orën 21:15.
Vendasit, për herë të fundit në Premier League ishin në sezonin 1997/98.
Ata kërkojnë kthimit në mesin e elitarëve për herë të parë pas 23 sezonesh.
Vendin e katërt e humbën vetëm në dy javët e fundit, pas humbjes ndaj Preston-it dhe barazimit ndaj kampionëve të Norwich-it.
Swansea në anën tjetër, për herë të fundit në Premier League ishte në sezonin 2017/18.
Skuadra nga Cardiffi është një nga 11 skuadrat uellsiane që kanë marrë pjesë në Premier League.
Dy ndeshjet e këtij sezoni mes dy skuadrave përfunduan të dyja në favor të Uellsianëve.
Ata fituan me rezultat idenik, 2-0, të dy duelet e sezonit të rregullt në Champions.
Ndeshjet e kthimit luhen të shtunën, më 22 maj.
Dy skuadrat që siguruan ngjitjen direkte në Premier League, janë Norwich dhe Watford.
Kurse, nga Premier League në Championship, do të vijnë West Brom, Fulham dhe Sheffield United.
Fituesi i play-off këtë vit do të përfitojë një shumë të jashtëzakonshme prej 200 milionë funtesh.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
