Jasharaj: Prej mijërave mësimdhënës, veç 17 po provojnë të punojnë – edhe ata të lidhur me pushtetin

“Vetëm 17 mësimdhënës janë duke tentuar të punojnë dhe ata dolën që janë të afërt me pushtetin”, deklaroi kryetari i Sindikatës së Bashkuar të Arsimit, Shkencës dhe Kulturës në Kosovë, Rrahman Jasharaj për Albanian Post.

Edhe pas takimit që është mbajtur me kryeministrin e Kosovës, Albin Kurti ai pohon se greva vazhdon të mbetet e njëjtë.

“Kemi shumë komuna dhe shkolla në raport me atë që më thanë greva është e njëjtë. Unë po them mund të ketë individë që dëshirojnë të punojnë. Besoj se do të ketë dezinformata edhe nga grupe të caktuara që disa shkolla kanë filluar punën”.

Sa i përket numrit të mësimdhënësve që janë në grevë Jasharaj thotë se ka probleme me dokumentet në shkolla për të ditur numrin e saktë të tyre.

“Në raportin që e kam dëgjuar në këshillin e SBASHK-ut aty flitet që pjesa më e madhe është në grevë. Kemi pasur edhe raste kur shkollat nuk kanë qenë faktike me dokumente”.

Ndërsa nga kryeministri i Kosovës, kreu i SBASHK-ut kërkon që jetë “kryeministër i të gjithëve”.

“Kryeministri i Kosovës, duhet të jetë kryeministër i të gjithëve dhe nuk duhet të lëshoj deklarime të tilla”.

Ai jep sqarimin e tij se pse i është drejtuar Kurtit si “vëlla”.

“Në kuptimin më të mirë për ta relaksuar bisedën i kam thënë po të lus si vëlla edhe si kryeministër. Termi “vëlla” është traditë tek shqiptarët kur bisedohet për diçka me zemër të hapur prej të dyja palëve. E kam përdorur në mënyrën më të sinqertë me qëllim shpirtërorë në asnjë kuptim tjetër”, deklaroi Jasharaj.

Greva e punëtorëve të sektorit publik në Kosovë do të vazhdojë, sepse as pas takimit të Këshillit Grevist me Kryeministrin e Kosovës, Albin Kurti, palët nuk kanë arritur dakordim.

Rrahman Jasharaj, kryetar i Këshillit Grevist dhe figura kryesore që po udhëheqë grevën në Kosovë, ka deklaruar se ata ishin gati për një kompromis, por qeveria nuk po lëvizë nga pozicioni i saj.

Në anën tjetër,Albin Kurti, në konferencë për media, menjëherë pas takimit me grevistët, e ka quajtur logjikën e negocimit të tyre si “logjikë të pazarit dhe shantazhit”.

“Unë nuk e di çfarë anëtarësie është ajo. Ata me mua janë sjellë sikur buxheti i Kosovës të ishe para e imja. Më thoshin na ndihmo si vëllai. Si vëllai të ndihmojë privatisht. Ka kaluar koha kur kryeministri të bëhet vëlla”.

Sipas tij kërkesa për 100 euro grevistët nuk e kishin fillimi, por e njëjta u doli rrugës.

“I kemi marrë për bazë të gjitha kërkesat e tyre dhe në projektligjin e ri të gjitha kategoritë janë trajtuar me kujdes të veçantë. Mësimdhënësit do të kenë kuocientin më të lartë ndonjëherë”.

Çfarë duan grevistët?

Grevistët kanë kërkesë që qeveria t’ua rris pagat për 100 euro shërbyesve publikë, përfshirë mësimdhënësit, derisa të futet në fuqi ligji për paga, i cili parasheh rritjet e nevojshme.

Ata thonë se për nëntë muaj rresht kanë kërkuar takim me Kurtin, por ai nuk i ka pranuar.

Gjithashtu, Jasharaj kishte deklaruar se i kanë dërguar 83 shkresa në qeveri dhe asnjëherë nuk kanë marrë përgjigje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.