Iniciativa “CorrWatch” kritikon MINT-in për mostransparencë në procesin e rekrutimit për drejtor të ARBK-së

Iniciativa “CorrWatch” ka shprehur shqetësimin për siç është thënë, mbyllje dhe mungesë të transparencës të Ministrisë së Industrisë, Ndërmarrësisë dhe Tregtisë (MINT) në proceset e rekrutimit për drejtor ekzekutiv të Agjencisë së Regjistrimit të Bizneseve të Kosovës (ARBK) në kuadër të MINT, ku i është futur garës për drejtoresh Lebibe Haliti, motra e deputetit të Lëvizjes Vetëvendosje, Enver Haliti.

Pos MINT, Iniciativa “CorrWatch” ka kritikuar edhe Ministrinë e Financave Punës dhe Transfereve për mostransparencë edhe pse monitorimi i shoqërisë civile në procese të rekrutimit është i garantuar edhe me legjislacionin në fuqi.

“Në rastin e drejtorit ekzekutiv në Agjencinë e Punësimit, ‘CorrWatch’ është njoftuar që njësia përgjegjëse është duke pritur përgjigje nga ministri i MFPT. Për pozitën e drejtorit ekzekutiv në AQP dhe sekretarit të përgjithshëm në MFPT, ‘CorrWatch’ nuk ka marrë asnjë përgjigje si dhe nuk është njoftuar për ta monitoruar procesin”, thuhet në reagim.

“Në MINT janë përgjigjur se do të lejohet monitorimi vetëm në fazën e verifikimit paraprak. Megjithatë, edhe përkundër konfirmimit, ‘CorrWatch’ nuk është ftuar për monitorimin e fazën e verifikimit paraprak”.

“Edhe më parë, ‘CorrWatch’ ka reaguar lidhur me mbylljen dhe mungesën e transparencës së MFTP për proceset rekrutuese për pozitën e Drejtorit të Përgjithshëm të Administratës Tatimore të Kosovës (ATK) dhe pozitën e Sekretarit të Përgjithshëm në MFPT”.

Sipas kësaj iniciative, mohimi i përfshirjes së shoqërisë civile nga këto ministri thuhet se është i kundërligjshëm, cenon garancitë e dhëna me ligj si dhe transparencën si njëra nga shtyllat kryesore të meritokracisë.

Në reagim thuhet se një praktikë e tillë rrezikon që këto procese të mbyllura të jenë subjekt i ndikimeve politike dhe personale, duke minuar kështu besimin e qytetarëve në institucionet publike.

“CorrWatch u bën thirrje ministrive në fjalë që të zbatojnë ligjin dhe krijojnë mundësitë për qasje të hapur dhe të drejtë, ku monitorimi nga shoqëria civile të jetë i plotë dhe gjithëpërfshirës në të gjitha fazat e procesit të rekrutimit ashtu siç garantohet me ligj”, theksohet në reagim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.