Një studim i fundit ka vënë në pikëpyetje efektivitetin e etiketave me kalori që shfaqen në meny dhe produkte ushqimore, duke sugjeruar se ato mund të mos ndihmojnë konsumatorët të bëjnë zgjedhje më të shëndetshme – dhe madje mund të kenë efektin e kundërt.

Hulumtimi, u realizua përmes nëntë eksperimenteve me mbi 2,000 pjesëmarrës. Sipas autorëve të studimit, kur njerëzit nuk merrnin parasysh kaloritë, ata vlerësonin më saktë dallimin mes ushqimeve të shëndetshme dhe të pashëndetshme, por sapo përfshiheshin kaloritë në vendimmarrje, vlerësimet bëheshin më të paqarta dhe më të moderuara, raportoi The Conversation.

“Kur pjesëmarrësit shihnin numrin e kalorive, ata jo vetëm që e ulën perceptimin e tyre për sa të pashëndetshme janë ushqimet jo të mira, por edhe sa të dobishme janë ato të shëndetshme”, tha një nga autorët e studimit.

Studiuesit e quajtën këtë fenomen “iluzioni i njohurisë për kaloritë” – një ndjesi e rreme që konsumatorët e kuptojnë mirë informacionin kalorik, vetëm për ta parë veten të pasigurt kur përballen me të.

Ndryshe nga të dhënat për yndyrat apo karbohidratet, të cilat njerëzit shpesh i anashkalojnë si më teknike, kalorite perceptohen si njësi të thjeshta. Por kjo thjeshtësi është mashtruese. Në vend që të ndihmojë, ajo krijon një pasiguri të brendshme që çon në vendime më pak të qarta dhe, rrjedhimisht, potencialisht më pak të shëndetshme.

A duhet hequr informacioni për kaloritë?

Autorët e studimit nuk propozojnë që informacioni për kaloritë të fshihet nga menytë apo produktet. Përkundrazi, ata theksojnë nevojën për ta bërë këtë informacion më të kuptueshëm dhe të dobishëm.

Një nga zgjidhjet që sugjerojnë është përdorimi i sistemeve ndihmëse vizuale, si treguesi me ngjyra “semafor” apo vlerësime të përgjithshme ushqimore, të cilat tashmë janë në përdorim në disa vende evropiane. Po ashtu, mund të ndihmojë paraqitja e kalorive në raport me nevojat ditore të konsumatorit – megjithëse kjo mbetet sfiduese, pasi nevojat ndryshojnë nga një person në tjetrin.

Studiuesit pranojnë se kërkimi i tyre hap edhe pyetje të reja, dhe se nuk është ende e qartë se si ndërveprojnë këto efekte me përdorimin në rritje të aplikacioneve të shëndetit, mjetet e personalizuara të ushqyerjes ose algoritmet e inteligjencës artificiale që sugjerojnë vakte.

Iluzioni i kalorive: Sa na ndihmojnë vërtet etiketat ushqimore?

Alketa Rama, Albanian Post

Të fundit

Aktuale