Haradinaj, pushtetit: Nëse bindni botën se drejtësia s’është e pavarur, si mendoni ekstradimin e Radojiçiç-it

Kryetari i Aleancës për Ardhmërinë e Kosovës (AAK), Ramush Haradinaj, ka thënë se nëse pushteti aktual i drejtuar nga Albin Kurti, e bindin botën se drejtësia nuk është e pavarur, atëherë si mendojnë se dikush do t’ua ekstradojë kryekriminelin Milan Radojiçiç – terroristi që i priu grupit parlamentar serb në Banjë të Zveçanit.

Këto komente, Haradinaj i ka bërë përmes një postimi në Facebook, pasi që eksponentë të pushtetit kanë akuzuar Prokurorinë e Kosovës se është e “kapur” nga opozita, pas intervistimit të Dejona Mihalit.

“Qysh ta kuptojmë logjikën e këtij pushteti? Ka vendosur kusht të dialogut ekstradimin e Radojçiç-it drejtësisë së Kosovës, e në të njëjtën kohë prej Kryeministrit, te Ministrja e Drejtësisë e tek deputetët e VV-së, krejt çka dëgjojmë është se drejtësia e Kosovës nuk është e pavarur”, ka shkruar Haradinaj.

“Dëgjojmë nga ata se opozita e kontrollon Prokurorinë, se gjyqtarët dhe prokurorët janë të kapur dhe vendimet e drejtësisë në vazhdimësi janë subjekt i interpretimeve politike të pushtetit”, shtoi.

Nëse e bindin botën se drejtësia nuk është e pavarur, atëherë ish-kryeministri pyeti se si mendojnë se dikush do t’ua ekstradojë Radojçiç-in?

“Apo e kanë këtë kërkesë vetëm për konsum të brendshëm elektoral?”.

Kreu i AAK-së potencoi se para dite Kurti thotë se Kosova është vendi më demokratik në rajon, e pasdite ai dhe njerëzit e tij e sulmojnë pavarësinë e drejtësisë dhe bëjnë përpjekje të hapur për ndërhyrje te gjyqësori.

“Kjo lidhje me shtet demokratik nuk ka. Përnjëmend, pushtet i çuditshëm!”, përfundoi ai.

Ndryshe, Dejona Mihali, Koordinatorja e Komiteteve në Lëvizjen Vetëvendosje – partia në pushtet – të premten në Prokurorinë Speciale është intervistuar për dy raste.

Përveç atij të ish-kryeshefit të Korporatës Energjetike të Kosovës (KEK), Nagip Krasniqit, ajo është intervistuar edhe për rastin e kryeshefit ekzekutiv të Bordit të Ndërmarrjes Hidroekonomike “Ibër-Lepenci”, Faruk Mujkës.

Masha e Vetëvendosjes – Kush është Dejona Mihali?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.