Futbollisti i Kosovës, Florent Hadërgjonaj, ka qenë njeriu vendimtar në fitoren e ekipit të tij Kasimpasa ndaj Gaziantep me rezultat 2:1, ndeshje kjo e vlefshme e javës së 31-të në Superligën e Turqisë.
Hadërgjonaj arriti të marrte meritën e tri pikëve të këtij takimi, pasi që shënoi golin e fitores në minutën e shtatë shtesë nga pika e bardhë e penalltisë.
Skuadra e Kasimpasa-s mbeti me një futbollist më pak në fushë që në minutën e 22-të, kur mesfushori boshnjak, Haris Hajradinovic, u përjashtua nga loja pas dy kartonëve të verdhë.
⚽️GOL: 90+7' Hadergjonaj (p)
📍Kasımpaşa 2-1 Gaziantep FK pic.twitter.com/p2x0NF7p9k— Sporx (@sporx) April 3, 2022
Mysafirët e Gaziantep më pas arritën të parët të kalojnë në epërsi në minutën e 35-të, me golin e realizuar nga senegalezi, Papy Djilobodji.
Nuk vonoi shumë dhe ekipi i Hadërgjonajt barazoi rezultatin në minutën e 41-të me golin e realizuar nga Jackson Muleka.
Në pjesën e dytë u zhvillua lojë e barabartë dhe deri në fund pritej që skuadrat t’i ndanin pikët me një barazim 1:1.
Megjithatë, kështu nuk mendoi edhe përfaqësuesi i Kosovës, Hadergjonaj, i cili shënoi golin e fitores duke ia sjell fitoren ekipit të tij.
Kujtojmë që ky ishte goli i dytë i Florentit për këtë edicion, derisa ai ka edhe një asistim tjetër.
Derisa kjo ishte një fitore e madhe e Kasimpasa-s, të cilët me këto tre pikë tashmë kanë siguruar një vend edhe për edicionin e ardhshëm në elitën e futbollit turk.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
