“E quajnë ‘mini-shengen’ dhe na thonë vazhdimisht që ky nuk është në kundërshtim me rrugëtimin drejt BE-së. Por kjo nuk është e vërtetë. Na thonë që i shërben bashkëpunimit rajonal. As kjo, nuk është e vërtetë”, ka thënë Donika Gërvalla, ministre e Punëve të Jashtme dhe Diasporës së Kosovës, në diskutimin jo-formal në Brdo Pri Kranju të Sllovenisë.
Gërvalla po merr pjesë atje bashkë me ministrat e Jashtëm të Ballkanit Perëndimor dhe zyrtarëve të Bashkimit Evropian.
Në këtë takim janë prezantuar edhe prioritetet e presidencës së Sllovenisë ku çështja e tejkalimit të situatës me pandeminë Covid-19 ishte tema kryesore.
Gërvalla ka folur edhe për bashkëpunimin rajonal dhe idenë e tregut të përbashkët rajonal si plan dhe strategji për bashkëpunimin rajonal dhe zgjidhje të konflikteve.
Ajo, siç njofton edhe MPJ e Kosovës në Facebook, ka thënë se në Ballkan ka aktorë që po tentojnë ta minojnë këtë koncept duke u përpjekur t’i kthejnë kohërat e vjetra në rajon, “kur përplasjet politike dhe ekonomike ishin të ndërlidhura”.
Në takim gjithashtu është diskutuar edhe për temat që lidhen me procesin e zgjerimit, sundimin e ligjit si dhe zgjidhjet për krijimin e një Evrope të qëndrueshme pas pandemisë Covid-19.
Kërkesë e të gjithë të pranishmëve në takim ishte që të bëhet vaksinimi në masë si mënyra e vetme për t’ju kthyer normalitetit shtetet.
Aktualisht, Sllovenia ka mandatin e Presidencës së Këshillit të Bashkimit Evropian, ndërsa nikoqir i takimit ishte sekretari slloven i Shtetit për Punët e Jashtme, z.Gašper Dovžan.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
