Dramë në Shkodër, Kukësi thyen Tiranën për herë të parë këtë sezon

Kukësi dhe Tirana matën forcat në ndeshjen kryesore të javës së nëntë në Kategorinë Superiore.

Në “Loro Boriçi”, pas një pjese të parë që nuk dhuroi pothuajse asgjë, e dyta ishte krejt ndryshe.

45 minutëshi i mbushur me plot emocione, në fund theu zemrat e kryeqytetasve.

Kukësi fillimisht kaloi në epërsi në minutën e 51-të, me një gol të Milunovic.

Veriorët vazhduan dominimin përgjatë gjithë takimit, por Tirana barazoi në minutën e 83-të.

Ky gol u duk se do të ishte vendimtari që bardheblutë të vazhdonin ecurinë e tyre pa humbje në kampionat.

Por, gjithçka ndryshoi pak sekonda para se gjyqtari i katërt të tregonte kohën shtesë.

Ishte kroati Edi Basa ai që me një gol shumë të bukur shënoi për rezultatin përfundimtar, 2-1.

Për Kukësin, kjo fitore është shumë e madhe dhe e rikthen shumë afër në luftën për titull. Pas nëntë javësh, Tirana ka 20 pikë, kurse Kukësi ndjek me 17 pikë.

Dy kryesueset janë të shkëputur nga pjesa tjetër e kampionatit, me Vllazninë dhe Teutën që vijnë prapa me nga 13 pikë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.