BE-ja planifikon një kredi të re për Ukrainën deri në 35 miliardë euro

Presidentja e Komisionit Evropian, Ursula von der Leyen, njoftoi planet për një kredi deri në 35 miliardë euro të mbështetur nga aktivet e bllokuara të bankës qendrore ruse për të ndihmuar në ofrimin e mbështetjes financiare për Ukrainën.

Lajmi u bë i ditur nga kompania mediatike “Bloomberg”.

Von der Leyen e zbuloi shifrën pas takimit me presidentin ukrainas Volodymyr Zelenskiy në Kiev të premten.

Huaja e Bashkimit Evropian është pjesë e një plani më të gjerë prej 50 miliardë dollarësh për të ndihmuar Ukrainën që doli nga negociatat me SHBA-të dhe vendet e G7-ës.

“Ne kemi besim se mund t’i japim shumë shpejt”, tha ajo në një konferencë shtypi me Zelensky-in. “Urgjenca është e qartë”.

G-7 kishte rënë dakord në qershor për një plan kredie të pakthyeshme për t’i siguruar Ukrainës rreth 50 miliardë dollarë ndihmë për t’i disbursuar deri në fund të vitit.

Kreditë do të paguheshin duke përdorur fitimet e krijuara nga 280 miliardë dollarë asetesh të ngrira ruse.

SHBA-të dhe BE-ja fillimisht kishin rënë dakord që secili të kontribuonte në shuma të ngjashme prej rreth 20 miliardë dollarësh, derisa Washington-i kërkoi një regjim më të qëndrueshëm të sanksioneve nga Evropa për të siguruar që fitimet e papritura të mbeten të disponueshme.

Regjimi i sanksioneve të BE-së që i mban ato asete të ngrira kërkon një zgjatje çdo gjashtë muaj me votim unanim të 27 vendeve anëtare, gjë që mund të jetë problem nëse ato nuk rinovohen në një moment.

Hungaria, e cila shpesh ka vonuar ose bllokuar përpjekjet e BE-së për të mbështetur Ukrainën, kohët e fundit propozoi shtyrjen e çdo vendimi për imobilizimin e aseteve ruse deri pas zgjedhjeve në SHBA më 5 nëntor.

Duke kërkuar të qetësonte shqetësimet e SHBA-ve, komisioni u paraqiti vendeve anëtare tre opsione për të imobilizuar asetet ruse për një kohë më të gjatë.

Një nga opsionet ishte zgjatja e periudhës së rinovimit për ngrirjen e aseteve në 36 muaj, sipas njerëzve të njohur me bisedimet.

Një propozim tjetër do të kishte zgjatur periudhën e rinovimit për pesë vjet, por ky opsion mund të paraqesë çështje ligjore nëse rikthimi i sanksioneve do të lejohej me shumicë të cilësuar, thanë njerëzit, të cilët folën në kushte anonimiteti.

Oferta përfundimtare do të zgjaste si sanksionet sektoriale ashtu edhe ngrirjen e aktiveve të bankës qendrore për 36 muaj.

Kur të vendoset mekanizmi i ri, BE-ja do të ndërpresë procesin aktual të përdorimit të të ardhurave nga asetet e ngrira ruse për të financuar ndihmën ushtarake për Ukrainën.

Huaja e re, e cila pritet të disbursohet në këste të ndryshme duke filluar nga fillimi i vitit 2025, do të jetë si shtesë e paketave të tjera të ndihmës, duke përfshirë një plan financiar prej 50 miliardë eurosh të BE-së, i përbërë nga grante dhe kredi për periudhën midis 2024 dhe 2027.

Marrë dhe përshtatur nga Bloomberg për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.