Ballkani fiton derbin me Dritën, Llapi afrohet me kreun

Java e 22-të në Superligën e Kosovës ka nisur me derbi.

Në stadiumin e qytetit të Gjilanit, vendi i parë Ballkani, udhëtoi te Drita e vendit të tretë që kishte vetëm një pikë më shumë.

Si çdo derbi në Kosovë, edhe ky i sotshmi ishte shumë i mbyllur, me të dy skuadrat që ishin të kujdesshme në mbrojtje dhe kërkonin që me kundërsulme të ndëshkonin kundërshtarin.

Pjesa e parë, por edhe e dyta ishte shumë e barabartë, me jo shumë raste të krijuara nga të dy palët.

Mirëpo, diferencën e bëri Theophilius Solomon.

Nigeriani gjeti golin e pestë sezonal dhe ndoshta më të vlefshmin deri më tani.

Goli i ish-futbollistit të Partizanit së Tiranës, ishte vendimtar në tri pikët e mëdha që e largojnë Ballkanin me katër pikë nga Drita, duke e dërguar me 45 pikë në krye.

Në anën tjetër, Llapi e kishte shumë të lehtë përballë Malishevës, duke e arritur fitoren e katërt në pesë takimet e fundit.

Skuadra e Tahir Batatinës, dominoi ndeshjen dhe shënoi shumë lehtë tri herë përballë Malishevës së vendit të shtatë.

Valmir Veliu dy herë në pjesën e parë, dhe Arbnor Ramadani në pjesën e dytë – shënuan golat për fitoren e madhe të Llapit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.