Anëtarësimi në SEPA, hap i rëndësishëm në rrugëtimin drejt BE-së

Shqipëria pritet të hyjë në SEPA, Zonën e Përbashkët Evropiane të Pagesave.

Anëtarësimi i Shqipërisë në SEPA shihet pozitivisht edhe nga institucionet financiare ndërkombëtare që shprehen në mbështetje te Shqipërisë dhe rajonit për zhvillimet konkrete të bëra në drejtim të tregut evropian të pagesave.

Ledia Bregu, Drejtore e Sistemeve të Pagesave, Kontabilitetit dhe Financës pranë Bankës se Shqipërisë mori pjesë në punimet 2-ditore të konferencës së 10-të Tirana Connectivity Forum organizuar nga Cooperation Development Institute dhe mbështetur nga Ministria për Evropën dhe Çështjet e Jashtme me temë “Better Together: Building a resilient Europe”.

Në panelin “Single Market and SEE6 Regional Cooperation”, Bregu prezantoi rëndësinë dhe avantazhet e Shqipërisë dhe Rajonit nga pjesëmarrja në Tregun Unik të Pagesave në Euro, për të cilin Shqipëria nëpërmjet Bankës së Shqipërisë ka aplikuar zyrtarisht në 12 Qershor 2024 pranë EPC.

Pjesëmarrësit përfaqësues të Institucioneve të ndryshme vendase dhe evropiane shprehën mbështetjen e Shqipërisë dhe rajonit për zhvillimet konkrete të bëra në drejtim të tregut evropian të pagesave dhe përforcuan avantazhet nga procesi anëtarësimit në SEPA si një hap i rëndësishëm në rrugëtimin e anëtarësimit në BE.

Kujtojmë se më 13 qershor Guvernatori i Bankës së Shqipërisë, Gent Sejko, ka firmosur për anëtarësimin e vendit në zonën gjeografike të skemave SEPA.

“Kjo është një ditë historike jo vetëm për sistemin financiar në vend, por për të gjithë qytetarët shqiptarët. SEPA është një iniciativë e hershme e Bashkimit Evropian për harmonizimin e pagesave elektronike në Euro, ndërmjet vendeve anëtare”, thuhet në njoftim.

Gjithashtu skemat e Pagesave SEPA i sigurojnë qytetarëve dhe bizneseve evropiane, pagesa ndërkufitare në monedhën e përbashkët, me të njëjtën kosto dhe lehtësi si pagesat brenda vendit të tyre.

Megjithatë, zona gjeografike SEPA shtrihet edhe jashtë vendeve të BE-së, duke numëruar deri tani 36 vende që kanë harmonizuar standardet për pagesat elektronike në euro.

Banka e Shqipërisë ka nisur punën për anëtarësimin e Shqipërisë në SEPA që në vitin 2021, kur u bë pjesë e projektit rajonal “Për modernizimin e sistemeve të pagesave në vendet e Ballkanit Perëndimor”.

Ky projekt e ka origjinën nga marrëveshjet e Procesit të Berlinit dhe synon zhvillimin e marrëdhënieve financiare dhe ekomomike midis vendeve të Ballkanit Perëndimor, si dhe njëkohësisht integrimin e rajonit në Bashkimin Evropian.

Në nëntor të vitit 2023, Komisioni Evropian shpalli planin e ri për rritjen e Ballkanit Perëndimor, ku një nga pritoritetet është pikërisht pjesëmarrja e vendeve të rajonit në SEPA. Në këtë mënyrë, Komisioni Evropian i dha mundësinë rajonit të përshpejtojë integrimin ekonomik në tregun unik evropian edhe përpara anëtarësimit të tij në Bashkimin Evropian.

Shqipëria është, kështu, vendi i parë në rajon, i cili dërgon aplikimin formal për t’u pranuar në zonën gjeografike SEPA.

“Pjesëmarrja e Shqipërisë në SEPA, jo vetëm që shënon një hap mjaft të rëndësishëm në rrugëtimin e integrimit evropian të vendit, por do të krijojë lehtësira për bizneset dhe konsumatorët shqiptarë në terma të kostos, kohës dhe thjeshtësisë me të cilën do të kryejnë transaksione ndërkufitare brenda tregut evropian”.

Projeksionet, bëhet me dije janë që në afat të mesëm, ekonomia shqiptare do të përfitojë disa qindra milionë euro nga aderimi në SEPA.

“Nga pikëpamja e stabilitetit financiar, pjesëmarrja në SEPA ofron një mënyrë për të adoptuar sisteme më moderne, më të sigurta dhe më eficiente të pagesave elektronike. Duke prezantuar alternativa të tilla për qytetarët tanë, synojmë të rrisim përdorimin e pagesave elektronike, uljen e përdorimit të cash-it dhe rritjen e përfshirjes financiare”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.