Real Madrid ka qenë efektivisht i pamposhtur për një sezon të plotë të ligës, i ndarë midis sezonit të kaluar dhe fillimit të atij aktual, pavarësisht se qasja e tyre e lojës kritikohet në mediat spanjolle.

“Unë nuk mendoj se është e vërtetë që ne luajmë keq”, tha Ancelotti në një konferencë për shtyp. “Ajo që bie më shumë në sy është se Real Madrid, gjatë këtyre viteve, nuk ka një identitet të vetëm, (ne) i kemi bërë gjërat mirë, kemi mbrojtur mirë në një bllok të ulët, kemi pasur tranzicione shumë të shpejta, kemi menaxhuar mirë zotërimin e topit në disa ndeshje”.

Sipas menaxherit italian, mospasja e një identiteti të qartë i bën disa të mendojnë se Real Madrid nuk ka një stil.

“Dhe kjo është e vërteta, ne nuk kemi një stil, kemi shumë stile”, theksoi ai.

Barcelona mban rekordin për ecurinë më të gjatë të pamposhtur në ligën spanjolle, duke kaluar 43 ndeshje pa humbje midis prillit 2017 dhe majit 2018 nën drejtimin e Luis Enrique dhe kryesisht Ernesto Valverde.

Madridi pret Alaves të martën duke synuar të zvogëlojë diferencën prej katër pikësh ndaj liderit katalanas, në atë që do të jetë ndeshja e 300-të e Ancelotti-t në krye të pankinës madrilene në të gjitha garat.

Trajneri italian tha se do të ketë “disa ndërrime” kur u pyet nëse golashënuesi i tyre më i mirë Kylian Mbappe do të startonte kundër Alaves, pasi Vinicius Junior e nisi nga stoli në fitoren 4-1 të së shtunës ndaj Espanyol.

Madridi i mposhti katalanasit në pjesën e dytë pasi nuk arritën të gjenin rrjetën para pushimit, gjë që kanë arritur ta bëjnë vetëm një herë në kampionat këtë sezon.

Mesfushori Jude Bellingham dukej se e lëndoi shpatullën e tij kundër Espanyol, një çështje me të cilën kishte probleme edhe sezonin e kaluar, por Ancelotti tha se do të jetë gati për përballjen me Alaves.

Trajneri konfirmoi gjithashtu se mbrojtësi francez Ferland Mendy ka nënshkruar një marrëveshje të re me Madrid-in, pas raportimeve se ai e zgjati kontratën e tij deri në vitin 2027.