Kryetari i Bashkimit Demokratik për Integrim (partia shqiptare ne Maqedoni të Veriut), Ali Ahmeti, përmes një postimi në rrjetin social Facebook ka përshëndetur vendimin e Parlamentit Evropian për miratimin e liberalizimit të vizave për qytetarët e Kosovës.

“Përshëndes deklarimin e sotëm unanim të Parlamentit Evropian pro liberalizimit të vizave për Republikën e Kosovës, që konfirmon lëvizjen e lirë të qytetarëve të saj në zonën Shengen nga 1 janari i vitit 2024”, shkroi Ahmeti në Facebook.

Ndërsa, këtë e konsideroi si një vendim të shumëpritur, “reflektim i drejtë ndaj realitetit të pakthyeshëm të shtetësisë së Kosovës dhe orientimit të saj të palëkundur evropian”.

Ndryshe, në procesin më të gjatë krahasuar me secilin shtet, pas plotë 12 vjetësh procedura, Parlamenti Evropian ka miratuar vendimin për liberalizimin e vizave për qytetarët e Kosovës.

Ky votim ishte hapi përfundimtar i proceduarës që kulmon me 1 janar 2024, kur kosovarët do të mund të udhëtojnë në zonën Schengen pa viza.

“Nuk kam marrë asnjë propozim për të refuzuar qëndrimin e Këshillit të ministrave të BE-së dhe asnjë amendament. Prandaj, është miratuar qëndrimi i Këshillit dhe është miratuar akti i propozuar”, tha kryetarja e Parlamenti Evropian, Roberta Metsola.

Më 19 prill, pritet të nënshkruhet akti ligjor për liberalizimin e vizave, ndërsa hapi i vetëm që duhet të bëhet pas kësaj, është botimi i vendimit në Gazetën Zyrtare të BE-së dhe hyrja në fuqi e tij.

Megjithatë, Kosovës, për dallim nga shtetet e tjera të rajonit, i janë dashur 12 vjet nga lansimi i dialogut për liberalizimin e vizave deri në lëvizjen e lirë në zonën Schengen.

BE na i hoqi vizat, pas 12 vjetësh