![](https://albanianpost.com/wp-content/uploads/2021/04/AP21110551368259-scaled.jpg)
Kritiku i burgosur i Kremlinit, Alexey Navalny deklaroi se i dha fund pas javёsh tё tёra grevёs sё tij tё urisё.
Njoftimi erdhi disa ditё pasi lideri rus i opozitёs u transferua nё njё spital burgu pёr shkak tё pёrkqёsimit tё shёndetit tё tij.
“Unë nuk e tërheq kërkesën për t’u trajtuar nga mjeku i nevojshëm- po humbas ndjeshmërinë në duar dhe nё këmbë dhe dua të di çfarë është dhe si ta trajtoj atë. Duke marrë parasysh progresin dhe të gjitha rrethanat, unë kam filluar të dal nga greva e urisë”, tha Navalny në një mesazh të ndarë nga ekipi i tij në Instagram.
Mjekët e udhëheqësit të burgosur rus, Alexei Navalny, e shtynë atë që t’i japë fund njëherë e mirë grevës së tij të urisë, duke e paralajmëruar se, përndryshe mund të vdiste.
Problemet e tij me veshkat dhe sistemin nervor të Navalny-t sugjerojnë që ai do të vdiste nëse greva e urisë vazhdon edhe për pak më shumë.
Mjekët thonë se Navalny duhet “të ndalojë menjëherë grevën e urisë për të ruajtur jetën dhe shëndetin e tij”.
Ata, gjithashtu, po kërkojnë t’i jepet asistencë mjekësore pacientit të tyre.
Autoritetet ruse nuk e kanë komentuar publikisht deklaratën e mjekëve.
Mijëra rusë u mblodhën të mërkurën e 21 prillit, duke kërkuar lirimin e Navalny-t.
Më shumë se 1 mijë njerëz u arrestuan në një sërë qytetesh, përfshirë Moskën, sipas grupit të monitorimit të Rusisë OVD-Info.
Navalny, i cili u burgos në shkurt, po kërkon trajtim mjekësor për dhimbje akute në shpinë dhe mpirje të këmbëve. Për më shumë se 20 ditë, ai ka qenë në grevë urie.
Vendet perëndimore thonë se Navalny u helmua me një agjent nervor gushtin e kaluar dhe mbijetoi për pak. Pas transferimit të tij në kujdesin intensiv në Berlin, toksikologët arritën në përfundimin se helmi ishte Novichok i shkallës së armëve ruse.
Perëndimi fajësoi shtetin rus për sulmin dhe Navalny akuzoi drejtpërdrejt presidentin Vladimir Putin. Kremlini mohoi çdo përfshirje dhe kundërshtoi përfundimin rreth Novichok-ut.
Navalny u burgos në shkurt, për shkelje të një dënimi me kusht për mashtrim në 2014-n. Ai thotë se çështja është e motivuar politikisht.
SHBA-të kanë paralajmëruar Rusinë se do të ketë “pasoja” nëse Navalny vdes në burg.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com