![](https://albanianpost.com/wp-content/uploads/2024/05/443822585_481339291221398_3182994068158183925_n-1.jpg)
Presidentja e Kosovës, Vjosa Osmani, të martën është takuar me të dërguarin e posaçëm të Gjermanisë për Ballkanin Perëndimor, Manuel Sarrazin, nga i cili ka kërkuar që të vazhdojë mbështetjen e Kosovës në forcimin e pozitës së saj ndërkombëtare – veçanërisht për anëtarësim në Këshillin e Evropës.
Takimi është bërë i ditur përmes një komunikate për media nga Zyra e Presidencës.
“Në të njëjtën kohë, Presidentja Osmani shtroi nevojën për vazhdimin e mbështetjes gjermane për forcimin e pozitës ndërkombëtare të Kosovës si dhe përmbushjen e aspiratave për anëtarësim në Këshillin e Evropës, NATO, BE dhe organizata të tjera ndërkombëtare”, thuhet në komunikatën e Zyrës së Presidencës.
Në takim është thënë se kanë biseduar edhe për zhvillimet e fundit politike dhe të sigurisë në vend dhe rajon.
“Presidentja Osmani theksoi përkushtimin e Kosovës në procesin e integrimit evropian, duke shprehur mirënjohjen për mbështetjen e Gjermanisë”.
E para e shtetit, i garantoi Sarrazinit mbështetje të plotë për Procesin e Berlinit dhe marrëveshjet e dalura nga ky proces.
Arsyeja pse Kosova nuk hyri në agjendën e seancës së radhës së Komitetit të Ministrave të Këshillit të Evropës më 17 maj, ku do të votohej pro apo kundër anëtarësimit të Kosovës në Këshillin e Evropës, ishte kushtëzimi që Gjermania dhe Franca i bënë Kosovës duke kërkuar nga ajo hapa konkret në raport me Asociacionin – të paktën dërgimin e draft-statutit të këtij mekanizmi në Gjykatën Kushtetuese për shqyrtim.
Kosova refuzoi të bëjë një gjë të tillë, madje kryeministri i Kosovës, Albin Kurti, tha se kushtëzimi i bërë nga Franca dhe Gjermania ishte “absurd”.
Autoritetet kosovare argumentuan se Berlini e Parisi kanë ngatërruar dy procese të pavarura, pra procesin e dialogut dhe procesin e anëtarësimit në Këshillin e Evropës, sipas tyre ky kusht i ri “nuk përkon aspak me vlerat dhe parimet e Këshillit të Evropës”.
Pak ditë pasi Kosova mbeti jashtë agjendës Qeveria e Kosovës, njoftoi se ka vendosur ta dërgojë një draft-statut për Asociacionin në Kushtetuese brenda majit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com