![](https://albanianpost.com/wp-content/uploads/2024/04/Hoti-1333x1000-1.jpg)
Seanca e Kuvendit të Kosovës në të cilën ishte paraparë vetëm një pikë e rendit të ditës ajo e pyetjeve parlamentare është ndërprerë në gjysmë, meqë shumica dërmuese e ministrave kanë munguar.
Mungesa e ministrave është kritikuar nga partitë opozitare.
Madje Aleanca për Ardhmërinë e Kosovës e ka lëshuar seancën.
“Kjo është injorim total i Qeverise ndaj Kuvendit. Ne menjëherë e lëshojmë. Nuk rrimë më. Le të dihet që Qeveria nuk i jep llogari këtij Kuvendin”, ka potencuar shefi i grupit parlamentar të AAK-së, Besnik Tahiri.
Ndërsa deputeti i Lidhjes Demokratike të Kosovës, Avdullah Hoti, mungesën e kabinetit ministror e ka cilësuar si tallje me Kuvendit.
Në anën tjetër Deputeti i Partisë Demokratike të Kosovës, Hisen Berisha, ka thënë se mungesa e ministrave është ikje nga përgjegjësia.
“Çka me ju thanë këtyre, turp për ta. Kjo është ikje nga përgjegjësia. Sa më shpejtë të shkojmë me një qeveri teknike që e përgatit vendin për zgjedhje”, ka theksuar ai.
Ndërkaq nënkryetarja e Kuvendit të Kosovës, Saranda Bogujevci, në tentim për të arsyetuar mungesën e ministrave ka insistuar se më shumë ka mungesë të deputetëve sesa të ministrave.
“Arsyeja pse e nisa seancën, në bazë të të dhënave kemi shumë mungesë të madhe nga deputetët edhe nga ministrat. Sot më shumë kemi mungesë të deputetëve sesa ministrave”, është shprehur ajo.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com