![](https://albanianpost.com/wp-content/uploads/2024/02/Albin-Kurti-Jeff-Hovenier-1-728x398-1.jpg)
Presidentja e Kosovës, Vjosa Osmani, në një prononcim për media, duke folur për rregulloren e re të Bankës Qendrore të Kosovës dhe kërkesën e komunitetit ndërkombëtar që kjo temë të diskutohet në procesin e dialogut në Bruksel, ka potencuar se “çështja mund të zgjidhet këtu në Kosovë”.
Për Osmanin kjo temë nuk është dashur fare të krijojë përplasje me aleatët, por sipas saj “nganjëherë është mungesa e komunikimit me kohë që i shkakton ato”.
Duke e portretizuar çështjen e rregullores së BQK si një problem të thjesht, Osmani është shprehur e bindur se “në rast vullneti me një takim i cili mund të zgjasë disa orë mund të konkludohen hapat konkretë” se si mund të zgjidhet.
“Kjo çështje mund të zgjidhet këtu në Kosovë, në fakt nuk është dashur të bëhet çështje fare, nuk është dashur të krijohet përplasje me aleatët tanë fare”.
Megjithatë, sipas saj nëse problemi me rregulloren e re të BQK-së nuk zgjidhet me kohë “mund të krijohen probleme të mëtejme”.
Duke komentuar raportet e Kosovës me komunitetin ndërkombëtar, Osmani ka theksuar se Kosova nuk mundet të ecë përpara vetë pa koordinim të ngushtë me aleatët dhe partnerët e saj mu në krye me Shtetet e Bashkuara të Amerikës.
Pra sipas saj në pyetjen Kushtetuta apo aleatët, Kosova duhet të zgjedhë që të dyja.
“Pra edhe Kushtetua edhe aleatët, këto të dyja nuk e përjashtojnë njëra-tjetrën, duhet të jemi bashkë në çdo hap që ecim përpara”, ka potencuar ajo.
Kur SHBA-të theksojnë se i duhen aleatët dhe partnerët për prosperitet atëherë sipas Osmanit, Kosovës një bashkëpunim i ngushtë me miqtë e saj i duhen shumë më shumë.
“Kosova nuk mundet të ecë përpara, në fakt asnjë shtet nuk mundet të ecë përpara vetë, edhe SHBA-të në çdo fjalim të presidentit Biden, ju do ta vëreni narrativen ‘ne duam të punojmë së bashku me partnerët dhe aleatët tanë’, kur kjo është e vërtetë për superfuqinë botërore është miliona herë më shumë e vërtetë për një shtet si Republika e Kosovës”, ka thënë ajo.
![](https://albanianpost.com/wp-content/uploads/2024/02/vjosa.jpg)
Prandaj sipas Osmanit në rast se Kosova dëshiron suksesin në rrugën përpara, kjo duhet të bëhet me aleatët.
“Nuk mundet Kosova të arrijnë asnjë sukses të qëndrueshëm pa bashkëpunimin dhe mbështetjen e aleatëve”.
Një vendim i Bankës Qendrore të Kosovës së fundmi ka shkaktuar fërkimin politik të radhës në mes të Qeverisë së Kosovës – e cila në emër të ligjit po tenton ta shtrijë sovranitetin në Veri të Kosovës – dhe komunitetit ndërkombëtar – i cili s’po do “surpriza” në terren, por zbatim të marrëveshjeve (Asociacionin).
Ndihmës-sekretari amerikan i Shtetit për Evropën dhe Euroazinë, James O’Brien, në intervistën e tij të fundit në Zërin e Amerikës artikuloi kritika të rënda në drejtim të kryeministrit të Kosovës, duke cilësuar Kurtin si të “paaftë” në qeverisje.
Me një gjuhë shumë të drejtpërdrejtë që jo shumë diplomatë kanë guximin ta përdorin, O’Brien tregoi se Kurti u kishte dhënë premtime ndryshe për çështjen e dinarit, por më pastaj ka vepruar ndryshe në terren duke vënë në pikëpyetje kështu edhe partneritetin me Shtetet e Bashkuara të Amerikës.
I pyetur se a ka biseduar me Kurtin për shqetësimet e SHBA-ve lidhur me vendimin e BQK-së për ndalimin e dinarit – valutë shtetërore e Serbisë – në territorin e Kosovës, numri një i amerikanëve për Evropën deklaroi se “kemi pasur disa biseda në periudhën para se të shpallej vendimi dhe një shkëmbim të shkurtë më pas”.
Në pyetjen se si Kurti e ka pritur vlerësimin e tij lidhur me këtë çështje, top-diplomati amerikan ka potencuar se ai “ka kuptuar shqetësimet” dhe se ka premtuar “se do të punonte për to”.
Por, çudia në sytë e tij ka ndodhur më pas kur Kurti krye në vete – ndryshe nga çfarë ka premtuar – ka proceduar me vendimin.
“Qartazi vendosi miratimin e vendimit. Nëse ai nuk na trajton si partner, kjo ngre pikëpyetje nëse ne mund ta konsiderojmë këtë qeveri si partnere”, vlerësoi ai.
Pjesa më problematike e kësaj interviste ishte pyetja pasuese e gazetarit dhe deklarata shqetësuese e me një mesazh të rëndë e O’Brien, i cili, si kurrë më parë, vuri në pikëpyetje marrëdhëniet në mes të Kosovës dhe SHBA-ve.
“Unë nuk bëj kërcënime të vagëta publikisht. Unë do të thoja, që nëse ne nuk trajtohemi si partner, edhe ne nuk do ta trajtojmë qeverinë e Kosovës si partnere”, tha O’Brien kur u pyet se a planifikojnë SHBA-të të veprojnë njëjtë si Bashkimi Evropian duke vendosur masa Kosovës, nëse ekzekutivi këmbëngul në qëndrimin e saj.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com