“Diplomat i jashtëzakonshëm, i ndihmon shumë Kosovës” – Haziri lavdëron Rohden, që Gërvalla kërkoi të largohet nga Kosova se “po përzihet”
![](https://albanianpost.com/wp-content/uploads/2024/02/ldk-scaled.jpg)
Nënkryetari i Lidhjes Demokratike të Kosovës, Lutfi Haziri, e cilëson si diplomat të jashtëzakonshëm ambasadorin aktual të Gjermanisë në Kosovë, Jorn Rohde, për të cilin Zëvendës-kryeministrja e Kosovës dhe Ministrja e Punëve të Jashtme, Donika Gërvalla, ka kërkuar nga Gjermania që ta largojë nga Prishtina.
“I jashtëzakonshëm si njeri, i jashtëzakonshëm si përfaqësues i shtetit gjerman dhe i jashtëzakonshëm si anëtar i QUINT-it. Falë tij Gjermania ka mobilizuar edhe mjete financiare jashtëzakonisht të mëdha në Kosovë. Së bashku me ambasadorin amerikan dhe britanik, Rohde ka luajtur një rol jashtëzakonisht të mirë në zhvillimin e jetës në Kosovë”, tha Haziri për Albanian Post.
Për Hazirin, kërkesa e Gërvallës për largimin e Rohdes nga Prishtina, “është përtej autorizimeve edhe kapaciteteve që Kosova”.
Haziri nuk beson që Rohde “po ndërhynë/përzihet shumë” siç ka pretenduar kryediplomatja kosovare.
Përkundrazi, ai e vlerëson shumë diplomatin gjerman, për të cilin thekson se “ka qenë këshilltar e, rekomandues i mirë, sidomos në sektorin e dialogut”.
“Ka qenë edhe mbështetës i një marrëveshje gjithëpërfshirëse obligative ku Serbia ish detyruar ta njihte de juro Kosovën jo vetëm de facto Kosovën”, potencoi ai.
Për ish-zëvendëskryeministrin kosovar, tash po konfirmohet që marrëdhëniet e shteteve kryesore ku hyn edhe Gjermania, “janë me popullin e Kosovës” dhe jo me “funksionarë që vijnë e shkojnë”.
“Një thënie thotë se ‘mos e këqyr çka po thotë, por shiko se kush të thotë’. Zakonisht kjo vlen më këta eksponent të qeverisjes së Vetëvendosjes që në fakt janë bërë administrator se nuk janë duke qeverisur në këtë vend”, nënvizoi Haziri.
“Dhe më e dhimbshme është gjendja në misione diplomatike dhe konsullore të Kosovës. Atje ka anarki totale, është mbyllje totale. Merren me çelësa të objekteve, çelësa të veturave dhe përcjelljen e eksponentëve të opozitës ku po shkojnë në takime”.
Ndryshe, një burim brenda MPJ-së së Kosovës dhe një tjetër brenda Ambasadës së Gjermanisë në Kosovë, kanë bërë të ditur për Albanian Post se kërkesa e Gërvallës u bë në vizitën e fundit të saj në Berlin, ku përveç takimit me kryetarin e Komisionit për Punë të Jashtme të Gjermanisë, Michael Roth, pati takim edhe me Ministrin e Mbrojtjes të Gjermanisë, Boris Pistorius.
Në takimin e 31 janarit me Pistorius, para vizitës së këtij të fundit në Prishtinë, Gërvalla ka shprehur ankesat e saj për Rohde-në dhe punën e tij në Kosovë.
Të njëjtat burime kanë sqaruar se Gërvalla është ankuar që diplomati që përfaqëson Gjermaninë në Kosovë “po ndërhynë/përzihet shumë” dhe se po shkruan shumë në platformën “X”.
“Po shkruan për çështje që nuk i takojnë dhe do të duhej të largohej nga Kosova”, ka qenë kërkesa e Donika Gërvallës. Por, Rohde nuk është i vetmi gjerman për të cilin është ankuar Gërvalla.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com