Pjesëtarë të FSK-së padisin Qeverinë e Kosovës, Çitaku: S’ka rëndësi epilogu, Qeveria tashmë e ka bërë dëmin
![](https://albanianpost.com/wp-content/uploads/2021/10/vlora.png)
Nënkryetarja e Partisë Demokratike të Kosovës, Vlora Çitaku, ndërsa ka komentuar raportimin e fundit të Albanian Post se qindra pjesëtarë të Forcës së Sigurisë së Kosovës, nga të gjitha rangjet, kanë dorëzuar padi individuale kundër Qeverisë së Kosovës, pasi kjo e fundit kundërligjshëm ua ka ndaluar shtesat në paga dhe kompensimet tjera, ka vlerësuar se kryeministri, Albin Kurti, “po dëshiron rrënimin e institucionit më kredibil në Kosovë”.
“Po dëshiron rrënimin e ushtrisë e cila është ndërtuar me gjak, djersë, mund dhe sakrificë. Po dëshiron rrënimin trashëgimtares së UÇK-së”, ka shkruar Çitaku.
Ajo ka pyetur Qeverinë e Kosovës se pse duhet armatosur FSK-ja, “kur po cenohet kaq shumë morali i ushtarit të FKS-së?”.
“Pak ka rëndësi epilogu i padisë. Qeveria tashmë e ka bërë dëmin”, ka konkluduar Çitaku.
Skandal: Qindra ushtarë të FSK-së aplikojnë për viza pune në ambasadën e Gjermanisë
Albanian Post raportoi të premten se qindra pjesëtarë të Forcës së Sigurisë së Kosovës, nga të gjitha rangjet, kanë dorëzuar padi individuale kundër Qeverisë së Kosovës.
Sipas padive që ka siguruar Albanian Post, ushtarët e FSK-së po e padisin qeverinë pasi kundërligjshëm ua ka ndaluar shtesat në paga dhe kompensimet tjera.
Këto të drejta atyre u takonin me Rregulloren “Për Pagat, Shtesat mbi Pagë dhe Kompensimet e Tjera në Ministrinë e Mbrojtjes dhe Forcën e Sigurisë së Kosovës për ngritjen e pagave në FSK”, e nxjerr nga Qeveria e Kosovës me 22 janar 2020, me numër “02/2020”.
Por, ajo rregullore nuk u zbatua asnjëherë dhe pjesëtarët e FSK-së nuk kanë marrë deri më tani diferencën në pagë që u ka takuar sipas saj, por as pagat jubilare.
Në anën tjetër, Qeveria aktuale me datën 28 korrik 2021 kishte nxjerr një vendim me shifrën “10/21”, me të cilin pezullonte rregulloren “02/2020”.
Tani pjesëtarët e FSK-së kanë filluar të kërkojnë realizimin e të drejtave të tyre që u takojnë përmes rrugëve ligjore e gjyqësore, duke paditur Qeverinë e Republikës së Kosovës për ato të drejta që u takojnë të realizojnë për diferencën në page dhe paga jubilare.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com