![](https://albanianpost.com/wp-content/uploads/2024/01/422910702_695734009420886_607116445878272824_n.jpg)
Organizata joqeveritare “Fourth Wave”, përmes një aksioni në rrugën ku mbeti e vrarë Liridona Ademaj, e që i dyshuari kryesor për vrasjen e saj është bashkëshorti i saj Naim Murseli, ka kërkuar drejtësi duke thënë se s’do të lejojmë të harrohet.
Aksionin e ka bërë të ditur organizata përmes një komunikate për media.
“Fourth Wave ndërmorri një aksion protestues për të shprehur kërkesën tonë për drejtësi ndaj rastit të Liridona Ademaj, e cila humbi jetën tragjikisht si pasojë e femicidit në Kosovë. Aksioni ynë u mbajt në rrugën ku asaj iu morr jeta”.
“Sllogani “Drejtësi për Liridona Ademaj. S’lejojmë t’harrohet”, simbolizon përkushtimin tonë të palëkundur ndaj kujtimit të saj dhe kërkimit të së vërtetës”, thuhet në komunikatë.
Ndërsa, është bërë thirrje tek sistemi i drejtësisë që kjo çështje të trajtohet me seriozitet.
“Ne i bëjmë thirrje sistemit të drejtësisë, që ta trajtojë këtë çështje me seriozitetin më të madh, duke theksuar rëndësinë e respektimit të parimeve të përcaktuara në Konventën e Stambollit, e cila ndalon gjykimet morale”.
“Është e domosdoshme që dëshmitë, veçanërisht ato që përfshijnë akuza për tradhëti, të vlerësohen në mënyrë të paanshme, duke siguruar një proces të drejtë ligjor”.
Organizata ka potencuar se Liridona Ademaj, meriton një gjykim të drejtë, ashtu sikurse edhe çdo rast tjetër i femicidit që po merr jetët e grave në Kosovë.
Më 26 janar, pas disa publikimeve në media që janë bërë për dëshminë e Naim Murselit – i dyshuar për vrasjen e Liridona Ademaj, dhënë institucioneve ka reaguar vëllai i saj, Leonard Ademaj.
Ai përmes një shkrimi në rrjetin social ‘Facebook’, kishte thënë se s’do e komentojnë përmbajtjen, por që janë të kënaqur me mënyrën e intervistimit.
“Për ta respektuar në plotni sekretin hetimor dhe procedurën penale, ne nuk do të komentojmë përmbajtjen e deklarimeve. Mirëpo, duam ta përmendim që jemi të kënaqur me mënyrën se si prokurorja ka organizuar intervistimin e tyre”, kishte shkruar ai.
“Ashtu siç parashihet me ligj, ne si familje kemi marrë pjesë në intervistim përmes avokatit tonë”.
Ai tutje kishte ritheksuar se drejtësia duhet të triumfojë për Liridonën dhe për të gjitha gratë dhe vajzat e vrara.
Naim Murseli, të mërkurën dha dëshminë në Departamentin për Krime të Rënda.
Sipas avokates së tij, Teuta Zhinipotoku, Murseli ka thënë se bëhet fjalë për diçka krejt ndryshe nga ajo që është raportuar në media dhe në rrjete sociale.
Çfarë ndodhi?
Liridona Ademaj, është vrarë më 29 nëntor në fshatin Bërnicë në Prishtinë.
Autoritetet e drejtësisë ende nuk e kanë bërë të ditur motivin e kësaj vrasjeje.
Vrasja e Liridonës ka marrë vëmendje të madhe, pasi fillimisht ajo ishte raportuar nga Policia e Kosovës si “grabitje me pasoja të vrasjes”.
Dy ditë më vonë, më 1 dhjetor, Policia ka njoftuar për arrestimin e dy personave: dorasin Granit Plava dhe Naim Murselin, bashkëshortin e viktimës, të dyshuar për vrasjen e saj.
Më pas u arrestua edhe Kushtrim Kokalla si pjesëmarrës në krim.
Në dosjen e dorëzuar në Gjykatën Themelore në Prishtinë më 2 dhjetor, Prokuroria Themelore, ka dhënë detaje të veprimeve që pretendohet se i kanë kryer Nam Murseli, Granit Plava dhe Kushtrim Kokalla, të dyshuar për vrasjen e Liridona Ademajt, më 29 nëntor në Prishtinë, rasti ky i cili fillimisht u cilësua si “Grabitje me pasojë vdekjen”.
Ndryshe, në dosjen e prokurorisë theksohet se ka pasur një “marrëveshje për një aksident të inskenuar”, ku i pandehuri, në këtë rast Naim Murseli, me dashje ka dashur të privojë nga jeta bashkëshorten e tij, duke bërë një marrëveshje paraprake me dorasin Granit Plavën.
Sipas Prokurorisë, Murseli, paraprakisht e ka pajisur me armë dorasin Plava duke inskenuar veprën e “Grabitjes”.
“Murseli derisa ishte duke lëvizur me veturë, në të cilën ishte bashkëshortja Liridona dhe dy fëmijët e tyre, papritmas ka dalë i pandehuri Plava para veturës, me maskë në kokë dhe revole në dorë, sipas marrëveshjes paraprake, i pandehuri Murseli me fëmijët ka dalë nga vetura dhe është larguar nga vendi i ngjarjes kinse për të ikur, derisa tani e ndjera Liridona ka mbetur në veturë”, thuhet në dosjen e Prokurorisë.
Në dosjen e Prokurorisë ndër të tjera theksohej se i pandehuri Granit Plava e ka qëlluar viktimën nga afërsia me një plumb në qafë.
“Ndërsa për këto veprime i pandehuri Naim Murseli, paraprakisht i ka premtuar të pandehurit Granit Plava, një shumë të të hollave prej 30 mijë euro”, thuhet në dosjen e Prokurorisë.
Dosja e Prokurorisë, gjithashtu, jep detaje edhe për përfshirjen e Kushtrim Kokallas në rastin e vrasjes, ku sipas Prokurorisë ky i fundit ka njoftuar Murselin me dorasin, në këtë rast Granit Plavën.
“Një javë para natës kritike, të pandehurit Murseli dhe Kokalla (me të cilin kanë raporte familjare- djalë i dajës dhe djalë i hallës) dhe i pandehuri Plava (shok i të pandehurit Kokalla), janë takuar në pompën e derivateve ‘Shell’, ku i pandehuri Plava i ka treguar se merret me gjithçka”.
Pas takimit të tyre në “Shell”, sipas Prokurorisë, thuhet se Murseli i kërkon Kokallës numrin e telefonit të të pandehurit Plava, kurse në ditën kritike Murseli takohet sërish me Kokallën në ora 9:30 në qytetin e Gjakovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com