![](https://albanianpost.com/wp-content/uploads/2024/01/888.jpg)
Ministri i Punëve të Brendshme, Xhelal Sveçla, ka fajësuar Prokurorinë për kidnapimin e policëve të Kosovës, që bëri tensionet në Veriun e Kosovës e deri tek sulmi i 24 shtatorit në Banjë të Zveçanit.
Ai në komisionin parlamentar për siguri tha se nëse s’do të vononte ky reagim edhe Serbia, por edhe terroristët do të ishin shumë të rezervuara për sulme.
“Vonesat tona, toleranca nga dikush tjetër, i ka trimëruar ata të vijnë deri te rasti i Banjës. Ne mund të pajtohemi që edhe mund të mos jetë rasti i fundit, prej Serbisë pritet gjithçka. Është shumë me rëndësi, që si masë preventive të ndërmerren të gjithë hapat e nevojshëm që këta terroristë të vihen para drejtësisë. Nuk kemi edhe shumë kohë”.
“Kemi dëshmi e suksese, por nuk e kemi kohën e pafundme që të shkojmë deri në perfeksion, të cilën asnjë agjencion i sigurisë në botë nuk e ka pasur. Në qoftë se dikush dëshiron, apo ka vullnet t’i lirojë kriminelët, pavarësisht dëshmive të policisë, aty po thirremi pastaj në pushtete të ndara”, tha Sveçla.
Duke folur për pajisjen e policëve me armë të gjatë, ai sqaroi se do t’i kenë të gjitha patrullat.
“Ka qenë pak e çuditshme për mua se si më herët nuk kanë pasur të gjithë zyrtarët policorë certifikim për përdorim të armëve të gjata. Ne i jemi futur këtij procesi dhe të gjithë zyrtarët do të jenë të trajnuar edhe për përdorimin e armëve të gjata që i kanë në dispozicion”, u shpreh ai.
Sipas tij, tashmë procesi hetimor për Banjën është duart e Prokurorisë e cila duhet të nis edhe ngritjen e aktakuzave.
“Një pjesë e këtyre dëshmive janë publike, e një pjesë është në duart e prokurorisë. Unë besoj fuqishëm se është koha e fundit që prokuroria e Kosovës të fillojë me ngritjen e aktakuzave apo të paktën një raport përfundimtar”.
Ai theksoi se këto hetime duhet të bëhen edhe për t’i informuar ndërkombëtaret për atë se cka ka ndodhur.
“Duke qenë se siguria patjetër është e lidhur edhe me segmente tjera të punës së institucioneve, e sidomos në diplomaci, është e duhur që edhe partnerët tanë ndërkombëtarë zyrtarisht të jenë të informuar se çfarë ka ndodhur me sulmin në Banjë, por edhe me atë se çfarë është zbuluar, si qëllimi i këtij grupi terrorist dhe të gjitha elementet tjera që e kanë mbështet, qoftë financiarisht, qoftë me trajnime e pajisje këtë grup terrorist që duhet tashmë se ka pasur për qëllim aneksimin e një pjese të veriut të Kosovës”, tha ai.
Kreu i dikasterit shtoi se në prokurori ka dëshmi të mjaftueshme dhe se policia ka bërë identifikimin e “shumicës së pjesëmarrësve” në sulm.
Një grup i armatosur më 24 shtator, kishte sulmuar Policinë e Kosovës në Banjë të Zveçanit, duke lënë të vrarë rreshterin, tanimë heroin Afrim Bunjaku.
Nga shkëmbimet me armë zjarri, Policia e Kosovës kishte asgjësuar katër terroristë, teksa gjashtë të tjerë i arrestoi.
Autoritetet e Kosovës kishin akuzuar drejtpërdrejtë Serbinë se qëndron prapa këtij sulmi terrorist, teksa kryekrimineli Milan Radojiçiç – njeri i besuar i presidentit serb Aleksandër Vuçiç – ka marrë përgjegjësinë për këtë sulm.
Radojiçiç ishte arrestuar nga autoritetet serbe, mirëpo i njëjti një ditë më pas është liruar nga paraburgimi.
Lidhur me sulmet terroriste, organet e rendit kanë sekuestruar arsenal armësh në Zveçan, të cilat u publikuan nga Policia pas sulmit, vlera e të cilave kapte shifrën 5 milion euro.
Vendet perëndimore, përfshirë Shtetet e Bashkuara të Amerikës dhe Bashkimi Evropian e kanë dënuar këtë sulm, derisa kanë kërkuar që përgjegjësit të sillen para drejtësisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com